Drejtori i Departamentit për Sigurinë Publike në Policinë e Shtetit, Dhimitraq Ziu, në një konferencë për mediet, tha sot se Policia e Shtetit, menjëherë pas njoftimit për dëmtimin e aksit Librazhd-Përrenjas, ka hartuar një plan masash për menaxhimin e situatës së qarkullimit rrugor.

Sipas Ziut, Policia e Shtetit bllokoi menjëherë kalimin në këtë aks rrugor, duke devijuar qarkullimin sipas direktivave të Autoritetit Rrugor Shqiptar (ARRSH).

Ziu bëri të ditur se u hartua një plan masash i menjëhershëm për menaxhimin e lëvizjes së automjeteve.

“Me marrjen e njoftimit, shërbimet e Policisë shkuan në vendngjarje, ndërprenë lëvizjen e mjeteve dhe u vunë në kontakt me ARRSH-në dhe subjektet që kryenin punimet. Po ashtu, u bë devijimi i lëvizjes së mjeteve në akse të tjera, sipas vendimmarrjes së ARRSH-së.

Nisur nga fluksi i madh i mjeteve, është hartuar një plan masash i detajuar, ku shërbimet e drejtorive vendore të Elbasanit, Korçës, si dhe ato të Kufirit dhe Migracionit, morën masa të posaçme për sigurinë rrugore, duke përfshirë të gjitha mjetet që do të lëviznin drejt zonës ku ka ndodhur dëmtimi.

Për këtë qëllim u dërguan forca shtesë nga shërbimet e Policisë Rrugore, si edhe nga Njësia e Posaçme Operacionale e Drejtorisë së Policisë Rrugore. Në të gjitha akset u vendosën shërbime policie 24 orë.

Drejtoria e Kufirit dhe Migracionit ka marrë masa për të orientuar në pikat e kalimit kufitar të gjithë drejtuesit e mjeteve për situatën e krijuar, duke respektuar normat dhe rregullat e përcaktuara nga ARRSH”, tha Ziu.

Marrë nga ATSH