Ministrja për Europën dhe Punët e Jashtme, Elisa Spiropali, priti sot në një takim delegacionin e Komisionit të Punëve të Jashtme të Parlamentit Europian (AFET), të kryesuar nga kryetari David McAllister.

Gjatë bisedës u diskutuan çështje kyçe për procesin e anëtarësimit të Shqipërisë në Bashkimin Europian, duke theksuar rolin mbështetës dhe të rëndësishëm të Parlamentit Europian.

Spiropali nënvizoi nevojën për vijimin me vendosmëri të reformave, me vitin 2026 si një moment kyç për zbatimin e planeve të bashkëdakordësuara.

Në fokus të takimit ishte gjithashtu rëndësia e linjimit të politikës së jashtme të Shqipërisë me atë të përbashkët të BE-së, si një investim strategjik në forcimin e bashkëpunimit ndërkombëtar.

Në takim u diskutuan gjithashtu mundësitë për zgjerimin dhe diversifikimin e bashkëpunimit me të gjitha institucionet europiane, përfshirë Parlamentin Europian, në të gjitha fushat, si për vendin kandidat, ashtu edhe për perspektivën e anëtarësimit të ardhshëm.

Spiropali falënderoi delegacionin për mbështetjen e vazhdueshme të procesit të zgjerimit dhe anëtarësimit të Shqipërisë në BE, duke e cilësuar si një investim të vyer për paqen, sigurinë dhe prosperitetin e kontinentit europian.

Burimi ATSH