Ministrja për Europën dhe Punët e Jashtme, Elisa Spiropali deklaroi sot në Forumin Ekonomik të Tiranës, pas përfundimit të Ministerialit të Korridorit VIII, se ky aks përfaqëson një projekt strategjik për rajonin dhe një mundësi konkrete për bizneset dhe investitorët.

Spiropali theksoi se korridoret nuk janë vetëm projekte infrastrukturore, por linja përgjatë të cilave lëvizin ekonomitë, energjia, ndikimi dhe siguria. Sipas saj, Korridori VIII është një projekt me rëndësi strategjike që forcon ndërlidhjen evropiane, qëndrueshmërinë e investimeve dhe sigurinë rajonale.

Ajo bëri të ditur se gjatë ministerialit me ministrat e Jashtëm u riafirmua angazhimi i përbashkët për të intensifikuar përpjekjet në mobilizimin e burimeve financiare përmes instrumenteve evropiane, institucioneve financiare ndërkombëtare dhe partneriteteve, duke e konsideruar këtë korridor si një aks të pavarësisë strategjike të rajonit.

Ministrja nënvizoi se, në një kohë kur zinxhirët e furnizimit lidhen drejtpërdrejt me sigurinë kombëtare, infrastruktura e transportit, rrugët, portet dhe hekurudhat, përcakton nivelin e ndërlidhjes ekonomike me Evropën dhe qëndrueshmërinë ndaj krizave.

Sipas saj, Korridori VIII lidh Adriatikun me Detin e Zi, duke krijuar një aks horizontal që bashkon vende anëtare të NATO-s dhe vende që synojnë anëtarësimin në Bashkimin Evropian, duke rritur mobilitetin strategjik dhe reziliencën rajonale.

Për Shqipërinë, ky projekt përbën një mundësi historike, duke e pozicionuar vendin si portën natyrore të Adriatikut në aksin lindje-perëndim. Investimet në porte, rrjete rrugore dhe hekurudhore janë pjesë e një harte më të gjerë evropiane që synon një rajon më të lidhur, më të sigurt dhe më konkurrues.

Spiropali shtoi se për biznesin, një infrastrukturë më e fortë nënkupton ulje të rrezikut, zgjerim tregjesh dhe financime më të sigurta. Sipas saj, bashkëpunimi përgjatë këtij korridori duhet të ecë paralelisht me tranzicionin e gjelbër dhe me respektimin e standardeve evropiane të qëndrueshmërisë dhe efikasitetit energjetik.

Ajo ftoi investitorët të bëhen pjesë e këtij transformimi që në fazën strategjike, duke theksuar se projekti gëzon mbështetje të qartë politike nga qeveritë e rajonit, Bashkimi Evropian dhe partnerët në NATO. “Korridori VIII është një projekt sigurie për shtetet dhe një projekt rritjeje për biznesin,” u shpreh Spiropali, duke shtuar se Shqipëria është e gatshme të jetë porta dhe partneri i këtij transformimi strategjik.

Burimi ATSH