Kryeministri Edi Rama sot zhvilloi një bashkëbisedim me fermerët në Krutje, ku diskutoi mbi rritjen e investimeve në bujqësi, lehtësitë e reja fiskale dhe risitë e skemës së re kombëtare për mbështetjen e këtij sektori, ku synohet arritja e një standardi të përgjithshëm prodhimi për tregun e madh të BE-së.

Gjatë bisedës me fermerët, kryeministri Rama tha se mbështetja për fermerët me skemën e re do të arrijë deri në 45–50 milionë euro, në varësi të faturimit.

Sipas Ramës, kur në skemë paguhej nafta, mbështetja ishte afërsisht rreth 300 euro, ndërsa me skemën e re ajo arrin deri në 7, 8 apo 9 mijë euro për fermerë.

“Për naftën, për disa vite kemi dhënë mbështetje direkte dhe kemi shpenzuar rreth 15 milionë euro, që mund të kenë qenë edhe 18 milionë euro. Tani, 15 milionë euro është dyshemeja që ne parashikojmë nga fatura. Por mundësia është që kjo të shkojë në 45–50 milionë euro, në varësi të faturimit tuaj. Do të merrni faturën dhe do ta dorëzoni atë. Pa faturë s’ka, thjesht. Janë para që nuk merren pa faturë.

“Nuk është që marrim taksat e të tjerëve dhe i japim tek ju. Nga faturat që ju do keni do të shkojnë deri në 50 milionë euro që do t’i japë qeveria. Do t’i merrni ato lekë, sepse është parashikuar kështu. Janë para që vijnë nga shitja juaj dhe nga TVSH-ja. Kështu që jemi të qartë për këtë. Nuk do t’i nxjerrim nga diku tjetër, nuk do t’i marrim dhe t’i lëmë në buxhetin e shtetit për t’jua dhënë më pas. Më parë merrnit 300 euro nga nafta, tani mund të merrni 8, 9 apo 10 mijë euro”, u shpreh Rama.

Kreu i qeverisë theksoi se më të përfituarit janë gjithmonë fermerët që bashkohen.

Burimi ATSH