Kryeministri Edi Rama deklaroi sot se në javën që nis nesër, në Tiranë do të zhvillohet Samiti i Diasporës, edicioni i katërt, që mbledh sërish shqiptarët nga të gjitha anët e botës.

Në episodin e radhës të podkastit “FLASIM – Mes valëve të detit dhe fushës së blertë”, Rama u shpreh se në samit marrin pjesë shqiptarë që jetojnë dhe punojnë jashtë vendit, por që kanë sytë nga Shqipëria dhe sa herë u jepet mundësia mendojnë, komunikojnë apo vizitojnë vendin.

Ai tha se aktiviteti nis më 13 prill me ceremoninë e mirëseardhjes, ku vëmendja do të jetë te njerëzit dhe historitë e tyre, histori suksesi, pune dhe përkushtimi, që sipas tij janë edhe histori krenarie shqiptare anembanë botës.

Kryeministri theksoi gjithashtu se do të ketë një hapësirë vlerësimi jo vetëm për shqiptarët që kanë kontribuar jashtë vendit, por edhe për miq të huaj që kanë zgjedhur të jenë pjesë e rrugës së shqiptarëve, duke u shprehur se “janë bërë bashkë dhe kanë bashkuar në një farë mënyre krahët e shqiponjës sonë”.

Sipas tij, diaspora sot është një forcë konkrete zhvillimi dhe vjen në këtë samit për herë të parë pas një përfshirjeje historike në zgjedhjet politike të vendit.

“Vjen si një hapësirë e zgjeruar e Shqipërisë përtej kufijve të saj dhe kthehet në një realitet shqiptar në transformim të vazhdueshëm, gjithmonë e më shumë si një partner i drejtpërdrejtë, duke filluar nga zgjedhjet politike, pastaj edhe tek ekonomia dhe hap pas hapi në rrugët e dijes drejt hapësirave të reja të së ardhmes. Dhe sfida jonë nuk është vetëm të mbajmë këtë lidhje në një nivel simbolik, por të strukturojmë një rrjet të tërë zemrash që rrahin për Shqipërinë anembanë dhe mendjesh që krijojnë vlerë të shtuar në një bashkëpunim që prodhon rezultate për vendin dhe jo vetëm për shqiptarët kudo ku janë”, u shpreh Rama.

/Marrë nga ATSH