Kryeministri Edi Rama theksoi sot rëndësinë e bashkimit të fermerëve, me synim arritjen e standardeve për tregun e madh të Bashkimit Europian.

Në një takim me fermerët në Krutje të Lushnjës, Rama solli shembuj suksesi të fermerëve që janë bashkuar në procesin e grumbullimit, ambalazhimit, marketimit dhe shitjes, duke u shndërruar në faktor të rëndësishëm në treg.

Ndërsa siguroi gjithë mbështetjen e mundshme për këto nisma, Rama theksoi se roli i bashkive është po ashtu kyç për të ndihmuar në krijimin e këtyre realiteteve.

“Nuk ka më kohë për të humbur me teori duhet apo jo kjo gjë. Sigurisht që duhet, por ka prapambetje në të bërit biznes. Ideja është që bashkohesh se interesat e të dyja palëve e duan këtë gjë dhe të dyja palët fitojnë nga kjo gjë. Kjo është shumë e thjesht”, tha Rama.

Kryeministri theksoi se këtë e dikton edhe nevoja për t’i rezistuar kohës dhe sfidës së tregut europian.

“Do të jemi në një treg me shumë oportunitete, por edhe sfida vdekjeprurëse për një kompani. Për t’u bërë pjesë e atij tregu jo thjesht duhet standardi i sigurisë ushqimore për shqiptarët, por duhet standard i njëjtë si në Europë edhe këtu”, tha Rama.

Burimi ATSH