Kreu i Dioqezës Tiranë-Durrës, Imzot Arjan Dodaj ndërsa përcolli mesazh urimi me afrimin e Krishtlindjes, e vuri theksin tek kujdesi që duhet treguar për të rinjtë.

Imzot Dodaj gjatë një interviste televizive, kërkoi që të rinjtë të mos shihen thjesht si numra, por t’u jepet kohë dhe hapësirë, duke filluar edhe nga institucionet shtetërore.

“Jetojmë me shumë ndërtesa, por pa jetë. Sot nuk mjafton të ndërtohen shkolla të reja, po nuk ndërtohen formues të rinj, edukatorë të rinj, sepse kultura e frikës i kthen në indiferencë ata që kanë përgjegjësi të edukojnë. Duke filluar nga institucionet e larta shtetërore, kush i ka përzemër të rinjtë? Të rinjtë shpesh herë janë numra që mund të shërbejnë në një moment të posaçëm, por pastaj në jetën e tyre të përditshme kush u jep kohë të rinjve?”, tha Imzot Arjan Dodaj.

Imzot Dodaj, u ndal edhe te simbolika e Krishtlindjeve, duke nënvizuar se ky është një moment shpirtëror për të gjithë dhe një zgjim i ndërgjegjes.

“Krishtlindja është jo Zoti lart, por Zoti midis nesh. Zoti rilind midis nesh sepse njerëzit rilindin në jetë, e të kuptojnë që ndërsa ecin pa Zotin, fatkeqësisht janë të komatizuar. Rilindja e Krishtit midis nesh, në misterin e Krishtlindjes, është zgjimi i ndërgjegjes së komatizuar. E kush më bukur se një fëmijë i ëmbël, fëmija Jezus, fëmija Zot, me përkëdhelje, me dashuri, pa imponim, mund ta bëjë për secilin prej nesh?”, tha Imzot Dodaj.

Arqipeshkvi i Dioqezës Tiranë-Durrës, ndau njëherësh edhe një mesazh për të gjithë besimtarët, në vigjilje të Krishtlindjeve.

Imzot Dodaj, nënvizoi se vendi ynë duhet ta kapërcejë polarizimin dhe të ketë më shumë mirëqenie shpirtërore, ekonomike dhe sociale për të gjithë.

“Të kapërcejmë një kontekst shumë të polarizuar që po përjeton vendi ynë nga aspekti social, politik… Mesazhi është që në të vërtetë vendi ynë ta kapërcejë këtë polarizim sepse mirëqenien shpirtërore, ekonomike, sociale, ta kenë të gjithë, sepse nuk mund të jetë luks për 1% të shoqërisë shqiptare që ka gjithë të mirat e vendit e të tjerët janë thjesht numra për të cilët kujtohemi një herë në katër vjet”, tha Imzot Dodaj.

Në 25 dhjetor, besimtarët e krishterë festojnë Krishtlindjen një prej festave më të rëndësishme të kalendarit kristian.

Burimi ATSH