Presidenti i Republikës, Bajram Begaj, ka shprehur sot vlerësimin e tij për Bahamasin, i cili ka njohur zyrtarisht shtetin e Kosovës, duke e cilësuar këtë hap si një kontribut të rëndësishëm për paqen dhe stabilitetin në rajon.

“Shpreh vlerësimin tim të sinqertë për Bahamasin për njohjen e Kosovës, një kontribut domethënës për paqen, stabilitetin dhe forcimin e rendit ndërkombëtar në rajonin tonë”, thuhet në mesazhin e Presidentit Begaj.

Bahamas është vendi i 121-të që njeh zyrtarisht Republikën e Kosovës. Lajmi u bë i ditur nga Presidentja e Kosovës, Vjosa Osmani, e cila njoftoi gjithashtu se është nënshkruar marrëveshja për vendosjen e marrëdhënieve diplomatike ndërmjet dy vendeve.

Presidentja Osmani e vlerësoi këtë njohje si një hap të rëndësishëm në forcimin e subjektivitetit ndërkombëtar të Kosovës dhe në zgjerimin e bashkëpunimit me vendet e Karaibeve, duke theksuar se diplomacia kosovare do të vijojë angazhimin për njohje të reja dhe konsolidimin e marrëdhënieve ndërkombëtare.

Burimi ATSH