Kryetari i bashkisë së Korçës, Sotiraq Filo zhvilloi sot një takim me ambasadorin e Suedisë në vendin tonë, Niklas Ström, ku u diskutua për thellimin e bashkëpunimit dhe për mundësitë e reja të investimeve suedeze në qytet.

Gjatë takimit, Filo theksoi se interesi i sipërmarrjeve suedeze për Korçën është në rritje, jo vetëm në sektorin e turizmit, por edhe në fusha të tjera të ekonomisë lokale që po zhvillohen me ritme të shpejta. Ai vlerësoi investimet suedeze si të mirëpritura dhe të rëndësishme për zhvillimin afatgjatë të qytetit.

“Korça është një qytet që transformohet dhe përmirësohet çdo ditë. Ajo ka potencial të jashtëzakonshëm për të mirëpritur jo vetëm mundësitë e reja, por edhe sfidat që na shtyjnë të ecim përpara me vizion dhe vendosmëri”, u shpreh Filo.

Ambasadori Ström u njoh nga afër me zhvillimet ekonomike, projektet infrastrukturore dhe prioritetet strategjike të Bashkisë së Korçës. Palët diskutuan gjithashtu për hapësirat e bashkëpunimit në inovacion, investime të qëndrueshme dhe nisma që mund të rrisin bashkëpunimin ekonomik mes dy vendeve.

Gjatë takimit u theksua se Suedia mbetet një partner i rëndësishëm për Korçën dhe se bashkia është e hapur për të mirëpritur projekte të reja që nxisin rritjen ekonomike dhe zhvillimin urban.

Burimi ATSH