Kryeministri Edi Rama e ka cilësuar “të mirë për të gjithë” marrëveshjen e mundshme mes Shteteve të Bashkuara të Amerikës dhe Kinës, gjatë fjalës së tij në Forumin e Paqes në Paris, nismë e presidentit francez Emmanuel Macron, ku marrin pjesë udhëheqës e personalitete nga e gjithë bota.

I pyetur në lidhje me takimin mes presidentit amerikan Donald Trump dhe presidentit kinez Xi Jinping, Rama tha se “vlerësimi im ka qenë shumë i thjeshtë: çdo marrëveshje midis SHBA-së dhe Kinës është e mirë për të gjithë, dhe çdo konflikt midis tyre është keq për të gjithë. Kjo është ideja ime, kaq e thjeshtë”.

Kreu i qeverisë shqiptare shtoi se dy fuqitë botërore duhet të bashkëpunojnë për stabilitetin global.

“Ata po takohen për një marrëveshje tregtare dhe, me sa kuptoj, pas asaj që ka ndodhur, të dy duhet të arrijnë një marrëveshje. E dini atë thënien: ‘Kur Amerika teshtin, bota kollitet’? Kur Kina teshtin, bota futet në karantinë. Prandaj duhet të bëhen bashkë për të mirën e botës, sepse nëse teshtijnë ata, ne nuk e përballojmë dot as të kollitemi”, deklaroi Rama.

Forumi i Paqes në Paris, i themeluar nga presidenti francez Macron, synon të forcojë bashkëpunimin ndërkombëtar dhe të promovojë dialogun për çështje globale si paqja, ekonomia, mjedisi dhe siguria.

Burimi ATSH