Mbi 70 sipërmarrëse shqiptare nga të gjitha qarqet e vendit prezantuan idetë, projektet dhe produktet e tyre në “EXPO Women 2025”, duke dëshmuar se energjia, kreativiteti dhe vizioni i grave përbëjnë një forcë të vërtetë zhvillimi për ekonominë shqiptare.

Në hapjen e aktivitetit, ministrja e Ekonomisë dhe Inovacionit, Delina Ibrahimaj, theksoi se përmes politikave të qëndrueshme dhe mbështetjes së qeverisë, gjithnjë e më shumë gra po gjejnë hapësira për të krijuar, investuar dhe udhëhequr në fusha të ndryshme të sipërmarrjes.

“Vetëm në programin e granteve për startup-e, 43% e fituesve janë gra, një tregues i qartë se barazia në mundësi po kthehet në një realitet të prekshëm”, deklaroi ministrja në fjalën e saj gjatë panairit.

Ibrahimaj vlerësoi gjithashtu bashkëpunimin me partnerët ndërkombëtarë, duke theksuar rolin e rëndësishëm që kanë UN Women, qeveritë e Suedisë, Italisë dhe Mbretërisë së Bashkuar në nxitjen e pjesëmarrjes ekonomike të grave dhe në mbështetjen e tyre për të zhvilluar biznese të qëndrueshme.

“EXPO Women” është shndërruar tashmë në një platformë të qëndrueshme për rritje, financim dhe bashkëpunim, duke krijuar një rrjet të gjerë të sipërmarrëseve shqiptare që kontribuojnë në zhvillimin ekonomik dhe social të vendit.

Ky edicion i panairit përforcon rolin e grave si motor i inovacionit dhe i zhvillimit të qëndrueshëm në ekonominë shqiptare.

Burimi ATSH