Muzeu Kombëtar “Shtëpia me gjethe” u prezantoi vizitorëve të tij një përvojë unike që kombinon artin, historinë dhe edukimin për gjithë familjen.

Në mjediset e muzeut u çel sot ekspozita “Fraktura 2025”, e artistëve Berina Kokona, Fabrizio Bellomo, Ergys Krisiko, Ervis Gjini, Kristanja Çene, Ardian Isufi, Ena Bulku dhe Altin Çelmeta. Punimet e tyre lidhen me të kaluarën, dhimbjen dhe rezistencën, por me një vështrim bashkëkohor mbi artin dhe reflektimin mbi kujtesën historike. Ekspozita është kuruar nga Elton Koritari.

Njëkohësisht me ekspozitën, muzeu “Shtëpia me gjethe” prezantoi edhe një projekt tjetër, “Guidën e familjes”. Kjo guidë e menduar posaçërisht për fëmijë dhe prindër, është një udhëtim ndryshe në “Shtëpinë me gjethe”. Familjet me të vegjlit e tyre do të realizojnë një udhëtim interaktiv e argëtues përmes të cilit do të mësojnë historinë.

Duke u nxitur kuriozitetin, fëmijët do të luajnë dhe do të pyesin, dhe në këtë mënyrë do të mësojnë më shumë për të kaluarën, të drejtat e njeriut dhe historinë e diktaturës në veçanti.

Në hyrje të muzeut familjet do të priten nga një ekran i madh ku prezantohet personazhi digjital Mia, një vajzë që udhëton në kohë. Së bashku me personazhet e tjerë, Arbërin dhe Besnikun, fëmijët zbulojnë se si ishte të rriteshe në një botë ku frika dhe propaganda kontrollonin çdo hap.

Ky udhetim nëpër “Shtëpinë me gjethe” është menduar si një lojë për të mësuar: me pyetje, pikë, animacione dhe detyra që ndihmojnë fëmijët të kuptojnë të drejtat e tyre, rëndësinë e privatësisë dhe të lirisë.

Gjatë guidës fëmijët “zbulojnë” përgjues, shohin dhomat e errëta dhe mësojnë për njerëz si Musine Kokalari dhe Edison Gjergo, që guxuan të flisnin dhe të krijonin në kushte të vështira.

Projekti “Guida e familjes” u realizua si një bashkëpunimi i Muzeut me Family Art Guides dhe është mbështetur nga Ministria e Turizmit, Kulturës dhe Sportit.

Burimi ATSH