Mirëmbajtja estetike e akseve rrugore është projekti më i ri i ARRSH që ka nisur të zbatohet në terren.

Zëvendëskryeministrja dhe njëherazi ministre e Infrastrukturës dhe Energjisë, Belinda Balluku inspektoi sot nga afër zonën e rrethrrotullimit të Rinasit, ku grupet e punës së ARRSH-së ishin në terren, të angazhuar për pjesën estetike, por edhe kujdesin për bimësinë.

“Duke pasur parasysh që ne kemi prej kohësh kontratat e mirëmbajtjes me performancë që bëhen të ndara sipas rajoneve për të mirëmbajtur të gjithë akset rrugore që mbarojnë kohën e garancisë, kemi vënë re që duke qenë se kilometrat e akseve shtohen, ka ardhur momenti për të pasur një element shumë të rëndësishëm për qytetarët e vizitorët. Pasi Shqipëria është kthyer në një pikë të madhe turistike ku vijnë vizitorë nga e gjithë bota, nuk është e rëndësishme që të kemi vetëm rrugë të sigurta, por edhe rrugë që plotësojnë kushtet estetike”, tha Balluku.

Balluku tha se në vitin 2023, ARRSH ka shtuar në fushën e saj të përgjegjësisë edhe mirëmbajtjen estetike të akseve kombëtare.

“Ne sot jemi në rrethrrotullimin e Rinasit ku po bëhet një punë e mirë për gjelbërimin, pasi një nga përgjegjësitë që ka pjesa e skuadrës që kujdeset për mirëmbajtjen estetike, përveç pastrimit, lyerjes me bojën fosforeshente, është edhe gjelbërimi”, vijoi ajo.

Një prej drejtuesve të skuadrës që kujdeset për pjesën estetike të akseve rrugore, tha se flota e re e mjeteve është në dispozicion të katër rajoneve në vend, ku janë shtuar kamioninçinat dhe autobotët me kapacitete prej 10 mijë litrash ujë.

Kreu i ARRSH-sës, Gentian Gjyli tha se puna po ecën edhe në rajone të tjera ku janë shpërndarë automjete në zonat që mund të gjelbërohen siç janë rrethrrollutimet apo hyrje- daljet në rrugët kryesore.

“Kjo është një fazë e parë që ARRSH ka ndërmarrë. Janë 25 punonjës për çdo rajon, por që do ketë reformime të tjera që të kapim numrin 100 punonjës për çdo rajon”, tha ai.

Ministrja Balluku u ndal edhe te një tjetër fenomen i evidentuar gjatë verës, siç është edhe problematika e pastrimit të akseve rrugore.

“Kompanitë e mirëmbajtjes kanë ndërhyrë, po fokusi ka qenë që të ruhen shtresat asfaltike, siguria rrugore, kur ka shkëputje të barrierave ndarëse, apo sinjalistikës. Por, nuk mund të kërkojmë të mbledhin edhe mbeturinat, pasi ky është një fenomen që ndodh sidomos me turistët. Drejtuesit shqiptarë të automjeteve sillen më mirë nga kushdo drejtues tjetër, pasi kemi edhe makina të marra me qira. Turizmi është bërë katër stinësh në Shqipëri dhe pjesa e pastrimit është pjesë e mirëmbajtjes estetike”, vijoi ajo.

“Ka ardhur momenti që të kemi një plan pune për sa i përket gjelbërimit, përzgjedhjes, ndarjes së rrugëve kombëtare, pemëve që duhet të qëndrojnë në dy anët e autostradave, pishat janë ato që rezistojnë më shumë, apo palmat në disa vende bregdetare, që i shkojnë edhe pjesës estetike”, pohoi Balluku, duke theksuar se aspekti estetik është po aq i rëndësishëm, sa siguria rrugore.

Burimi ATSH