Ministrja e Ekonomisë dhe Inovacionit, Delina Ibrahimaj ishte e pranishme sot në prezantimin e gjetjeve të raportit mbi gatishmërinë e bizneseve shqiptare për integrimin në tregun e përbashkët të Bashkimi Evropian, duke e cilësuar atë si pikënisje për një program të ri mbështetjeje për sektorin privat.

Sipas saj, programi do të shoqërojë biznesin përgjatë katër viteve të ardhshme, në funksion të përgatitjes për standardet, konkurrencën dhe kërkesat e tregut europian.

“Gjetjet e raportit tregojnë qartë sfidat, mungesë informacioni për standardet, nevojë për certifikime, kapacitete të kufizuara për eksport dhe mungesë mbështetjeje të strukturuar për biznesin”, u shpreh Ibrahimaj.

Në këtë kuadër, ministrja theksoi se fokusi i qeverisë do të përqendrohet në mbështetje konkrete për përputhshmërinë me standardet europiane, rritjen e kapaciteteve për eksport dhe ndërkombëtarizim, si dhe investime në aftësi, teknologji dhe financim për biznesin.

Ibrahimaj nënvizoi se, ky është fillimi i një pune të gjatë që kërkon bashkëpunim të ngushtë me biznesin, për ta kthyer integrimin në zhvillim konkret ekonomik.

Burimi ATSH