Thomson Media dhe Delegacioni i Bashkimit Evropian në Shqipëri, ndanë mbrëmë Çmimin e Bashkimit Evropian për Gazetari Investigative, për gazetarët që u vlerësuan për artikujt më të mirë investigativë të vitit në Shqipëri.

Çmimi i parë shkoi për gazetarët Geri Emiri dhe Erjola Azizolli nga “Amfora.al”. Çmimi për vendin e dytë, i ndarë, shkoi për gazetarët Vladimir Karaj nga “Reporter.al” dhe Edmond Hoxhaj po nga “Reporter.al”, ndërsa çmimi i tretë u fitua për gazetaret Erisa Kryeziu dhe Esmeralda Keta nga “Citizens.al”.

“Urime fituesve të Çmimit të BE-së për Gazetari Investigative të organizuar nga Thomson Media”, njoftoi Delegacioni i BE-së.

I pranishëm në aktivitet ishte edhe ambasadori i Bashkimit Evropian në vendin tonë, Silvio Gonzato. Gjatë fjalës së tij, Gonzato theksoi se BE do të vazhdojë të mbështesë reformat që krijojnë një mjedis më të sigurt dhe më të drejtë për gazetarët.

“Në Shqipëri, gazetaria investigative vazhdon të luajë një rol kyç në promovimin e transparencës dhe llogaridhënies. Ne jemi të vetëdijshëm për sfidat me të cilat përballen gazetarët, nga frikësimi dhe presioni ekonomik deri te pronësia e përqendruar e medias. BE-ja do të vazhdojë të ngrejë këto shqetësime dhe të mbështesë reformat që krijojnë një mjedis më të sigurt dhe më të drejtë për gazetarët.

Në të njëjtën kohë, ne do të vazhdojmë të investojmë në gazetari të pavarur, iniciativa për verifikimin e fakteve dhe njohuri mediatike, sepse qytetarët e informuar janë mbrojtja më e mirë kundër dezinformimit dhe manipulimit”, ambasadori i BE-së, Silvio Gonzato.

Burimi ATSH