Instituti për Bashkëpunim dhe Zhvillim (CDI) organizoi tryezë të rrumbullakët me temë: “Monitorimi i Agjendës së Reformave në Shqipëri”, ku u diskutua progresi i vendit në kuadër të Instrumentit për Reforma dhe Rritje (RGF).

Në këtë takim u prezantua Raporti i Parë i Monitorimit të RGF, i cili vlerëson arritjet deri në qershor 2025 dhe nënvizon rëndësinë e bashkëpunimit ndërinstitucional, transparencës dhe përfshirjes së qytetarëve si elementë kyç për suksesin në rrugën drejt Bashkimit Evropian.

Drejtuesja e Agjencisë Shtetërore të Programit Strategjik dhe Koordinimi të Ndihmës, SASPAC, Eridana Çano, theksoi rezultatet pozitive të Shqipërisë në zbatimin e reformave.

“Jam krenare që Shqipëria kryeson rajonin, me 51% të masave të përfunduara, përqindjen më të lartë në Ballkanin Perëndimor”, deklaroi ajo.

Tryeza mblodhi përfaqësues të institucioneve shtetërore, organizatave të shoqërisë civile dhe partnerëve ndërkombëtarë, duke sjellë vëmendjen te nevoja për një monitorim të rregullt dhe të hapur të reformave, si dhe një angazhim të qëndrueshëm për përmbushjen e objektivave të integrimit evropian.

Burimi ATSH