Fshati Dvoran në Korçë u mbush këtë fundjavë me ngjyra, muzikë dhe aromën karakteristike të mollëve, në një nga festat më të dashura të zonës “Festa e Mollës”, e organizuar nga Bashkia e Korçës, tashmë një traditë e përvitshme që mbledh bashkë fermerët dhe banorët për të festuar frytet e punës së tyre.

Festa nisi me një panair të pasur produktesh lokale, ku ekspozuan fermerët më të mirë të zonës, duke ofruar për vizitorët varietete të ndryshme të mollëve dhe nënprodukte të tyre si: reçel, lëng molle, komposto apo uthull molle.

Aktivitete të shumta për fëmijë, lojëra tradicionale dhe më pas një koncert festiv me artistë të njohur të zonës, i dhanë atmosferës një ngjyrim të veçantë, duke e kthyer festën në një manifestim të gëzueshëm për të gjitha moshat.

Kryetari i Bashkisë Korçë, Sotiraq Filo, u shpreh se, kjo është një ngjarje që promovon bujqësinë.

Filo, ndau momente nga festa në rrjetet sociale, duke theksuar rëndësinë e mbështetjes së fermerëve dhe ruajtjes së traditave bujqësore.

“Si çdo vit, organizuam këtë festë në fshatin Dvoran, duke promovuar produktin vendas, mollën dhe nënproduktet e saj”, tha ai.

Ndërsa nënkryetari i bashkisë, Kletjon Kita, u shpreh gjatë një takimi me fermerët pjesëmarrës se, pavarësisht ngricave që ndodhën gjatë çeljes së mollës në mars–prill, fermerët kanë arritur të mbajnë mbi 80% të prodhimit. “Jam optimist për ecurinë e sektorit bujqësor dhe më vjen mirë që fermerët, me ndihmën e Bashkisë dhe punën e tyre, ia kanë dalë”, theksoi ai.

Fermerët konfirmojnë se prodhimi i këtij viti ka qenë i kënaqshëm, ndonëse i ndikuar nga ngricat e pranverës. Varietete të tilla si Gold, Starking, Granny Smith, Fuji dhe Kanadeze kanë dominuar prodhimin.

“Sasia është më e ulët se vitet e tjera për shkak të kushteve atmosferike, por tregu është mirë dhe çmimi i shitjes i kënaqshëm, si për cilësinë e parë, ashtu edhe për mollët për industri”, thanë disa nga fermerët pjesëmarrës.

“Festa e Mollës” në Dvoran nuk është thjesht një ngjarje bujqësore, por një simbol i punës, përkushtimit dhe bashkëpunimit të komunitetit rural me institucionet, duke përforcuar lidhjen mes traditës dhe zhvillimit.