Kryeministri Edi Rama paralajmëroi sot se nuk do të lejohet më futja e njerëzve në apartamentet e reja, pa u pajisur më parë me hipotekë.

Në një konferencë për shtyp, Rama prezantoi një paketë masash ligjore që synojnë forcimin e kontrollit mbi territorin, mbrojtjen e hapësirave publike, zbatimin cilësor të lejeve të ndërtimit si edhe ndëshkimin e ndërtimtarisë së paligjshme.

Kryeministri detajoi disa prej këtyre masa që mbrojnë direkt qytetarët.

“Kemi detyrimin për dhënien e certifikatës së përdorimit nga autoritetet përgjegjëse të zhvillimit të territorit vetëm pas konfirmimit të aktit të kontrollit nga njësia e vetëqeverisjes vendore, që përfshin edhe përfundimin sipas lejes së ndërtimit të fasadave, rifiniturave dhe sistemit të jashtëm në përputhje me projektin arkitektonik të miratuar”, tha Rama.

Po ashtu, Rama bëri të ditur se për ndërtimet e reja është shtuar edhe detyrimi që uji dhe dritat lidhen vetëm pas marrjes së certifikatës së përdorimit.

“Arsyeja pse njerëzit mbeten pa hipotekë është se ndërtuesit nuk respektojnë të gjithë parametrat e lejes së ndërtimit. Mbikëqyrja nga ana e bashkive është konstatuar të jetë jashtëzakonisht e dobët, gjë që kthen drejtpërdrejt në viktimë atë që është në fakt jo vetëm i pafajshëm, por që është edhe i zoti i investimit, qytetari që ka paguar për të pasur një shtëpi”, tha Rama.

Nga ana tjetër, Kryeministri theksoi se nuk do të lejohet më që në godinat apo pallatet pa certifikatë përdorimi të lidhen ujë dhe drita.

“Nuk do lejohen më që të merren njerëzit, të futen në apartamente pa u përfunduar ashtu si duhet objekti dhe pa u pajisur njerëzit me hipotekë. Futen në apartamente, janë në shtëpinë që e kanë paguar me gjithë kursimet e tyre, por nuk janë pronarë në letra”, tha Rama.

Kryeministri e konsideroi këtë të papranueshme dhe të patolerueshme më tej.

Burimi ATSH