Kryeministri Edi Rama prezantoi sot ministrin e Drejtësisë, Besfort Lamallari, në një ceremoni të organizuar në ambientet e kësaj ministrie.

Kryeministri e konsideroi këtë kalim stafete, njëlloj emocioni dhe ndjesie të veçantë pasi sipas tij, sot merr detyrën shumë sfiduese të ministrit të Drejtësisë, një ndër shërbëtorët më shembullorë të shtetit shqiptar, që i është dhënë mundësia të njohë.

“Ministri i ri i Drejtësisë e ka nisur rrugëtimin e tij me studime brenda e jashtë vendit dhe pastaj i ka ngjitur shkallët një e nga një me një angazhim dhe përkushtim shembullor në çdo detyrë që i është besuar”, tha Rama.

Kryeministri shprehu besimin se me mbështetjen e ekipit të kësaj ministrie në bashkëpunim dhe ndërveprim me të gjithë punonjësit dhe drejtuesit e institucioneve të varësisë Besfort Lamallari do t’ia dalë të çojë përpara një punë të nisur prej disa vitesh tanimë dhe të vazhduar nga ministri i deritanishëm Ulsi Manja.

“Natyrisht që në kushtet kur ne kemi marrë përsipër një transformim epokal të marrëdhënies të pushtetit ekzekutiv me gjyqësorin roli i Ministrisë së Drejtësisë ka ndryshuar dhe sfidat e Ministrisë së Drejtësisë janë ridimensionuar”, tha Rama.

Por kjo sipas tij, “nuk nënkupton që rëndësia e Ministrisë së Drejtësisë është zvogëluar, apo që pesha që kjo ministri ka në të gjitha proceset vendimmarrëse apo të shtetbërjes europiane të Shqipërisë është zvogëluar”.

Në të vërtetë, Rama theksoi se roli dhe pesha e Ministrisë së Drejtësisë janë po aq të rëndësishme sa kanë qenë.

“Mbi të gjitha detyrimi që ka Ministria e Drejtësisë për të mbajtur në mënyrë konstante busullën orientuese për të gjitha proceset vendimmarëse është një detyrim shumë i madh. Ndërkohë që territori i mbulimit të çështjeve të drejtësisë në shtetin shqiptar është territori që zë vendin më të gjerë në procesin e negociatave të anëtarësimit”, shtoi Rama.

Burimi ATSH