Kryeministri Edi Rama ndodhet sot në Bruksel ku u hapën edhe 4 kapituj të rinj, duke e çuar në 28 numrin e kapitujve të hapur në procesin e negociatave.

I shoqëruar nga Komisionerja për Zgjerimin e BE-së, Marta Kos, kryeministri u njoh me “murin” e zgjerimit, ku pasqyrohet me piketa ecuria e Shqipërisë në procesin e integrimit europian.

Kryeministri vlerësoi se me çeljen e këtyre 4 kapitujve, “Shqipëria shënoi një tjetër hap përpara në rrugëtimin drejt BE-së”.

“Hapim 4 kapituj të rinj, duke e çuar në 28 numrin e kapitujve të hapur, një ritëm rekord në procesin e negociatave. Urime ekipit negociator dhe të gjithë shqiptarëve!”, u shpreh Rama.

Nga ana e saj, Komisionerja Kos shpjegoi ecurinë e Shqipërisë në murin e zgjerimit, ku pasqyrohet statusi i çdo grup-kapitulli në raport me negociatat për anëtarësim.

“Sigurisht, tani jemi të përqendruar te kjo pjesë, sepse ky është vërtet një përjashtim i mënyrës si e bënim këtë. Shqipëria ka ecur kaq shpejt! Kur erdha në dhjetor, thuajse gjithçka ishte me të kuqe. E kuqja tregon që nuk është hapur ende, e verdha që është hapur dhe e gjelbra që është mbyllur provizorisht”, u shpreh Kos.

“Mesa duket sapo kemi çelur një tjetër grup-kapitull. I dashur Kryeministër, i dashur Edi, keni nderin që ndërsa unë heq të kuqen, ju do të vendosni ngjyrën e re”, shtoi ajo.

Pas çeljes së këtyre kapitujve, për Shqipërinë kanë ngelur vetëm 5 kapituj për t’u hapur.

Komisionerja Kos siguroi se hapja e tyre do të bëhet brenda këtij viti, sipas planit.

“E mbështes fort planin tuaj për të mbyllur negociatat, që do të thotë, të jenë të gjitha me ngjyrë të gjelbër deri në vitin 2027 dhe, pastaj, sigurisht, t’ju kemi në BE sa më shpejt të jetë e mundur. Për mua është thellësisht mbresëlënës përkushtimi, juaji personalisht – sepse kjo lidhet me drejtimin – dhe i ekipit, që po ecën mirë; jo vetëm ju, por i gjithë ekipi. Urime, edhe një herë! Është vërtet privilegj për mua të punoj me Ju”, theksoi ajo.

Nga ana e tij, Rama falënderoi ekipin e BE-së në Shqipëri, që na rri gjithmonë “mbi kokë”, për t’u siguruar që të mos shpërqendrohemi dhe që të mos mendojmë në përmasë më të madhe për veten nga ç’duhet.

Grup-kapitulli 4 që u hap sot përfshin fusha kyçe si tranzicioni i gjelbër, mbrojtja e mjedisit, energjia e pastër, ndërlidhja e qëndrueshme e transportit, të cilat janë në qendër të Marrëveshjes së Gjelbër Europiane dhe prioriteteve strategjike të BE-së.

Burimi ATSH