Të mërkurën në mbrëmje u zhvillua në Pallatin e Madh të Popullit në Pekin galaja “Fitorja e drejtësisë”, me rastin e 80-vjetorit të fitores së Luftës së Rezistencës të Popullit Kinez kundër Agresionit Japonez dhe të Luftës Antifashiste Botërore.

Presidenti kinez Xi Jinping dhe udhëheqës të tjerë e ndoqën këtë gala.

Pas hyrjes në sallë, Xi Jinping-u dhe udhëheqësit e tjerë shtrënguan duart me përfaqësues të veteranëve të luftës kundër agresionit japonez.

Filmi multimedial me muzikë, poezi dhe valle “Duke kujtuar malet dhe lumenjtë” çeli siparin e galasë. 80 vjet më parë, pas 14 vjetësh lufte të paepur dhe të përgjakshme, populli kinez mundi agresorët japonezë. Kjo Luftë e madhe e Rezistencës e Popullit Kinez kundër Agresionit Japonez shënoi fillimin e Luftës Antifashiste Botërore dhe hapi fushëbetejën kryesore në Lindje. Lufta kundër agresionit japonez dha një kontribut të jashtëzakonshëm në shpëtimin e kombit nga rreziku, në arritjen e pavarësisë kombëtare dhe në çlirimin e popullit, si edhe për paqen botërore.

Galaja përbëhej nga 5 pjesë “Gjëmo, Lumi i Verdhë”, “Ylli i kuq mbi Kinën”, “Forca e pamposhtur”, “Agimi i përbashkët” dhe “Drejtësia e përhershme”. Artistët përdorën këngët, vallet, poezitë, pjesët dramatike etj. për të shfaqur historinë e luftës së paepur të popullit kinez kundër agresionit japonez dhe fitoren e madhe të kësaj lufte.

Programi u mbyll me vallen e kënduar “Bashkësia me fate të përbashkëta”. Në fund të galasë të gjithë të pranishmit kënduan së bashku “Duke kënduar për atdheun”.

Burimi CGTN