Porti i Durrësit gjatë fundjavës që lamë pas ka përballuar me sukses një fluks të konsiderueshëm të hyrjeve.

Sipas Autoriteti Portual Durrës, nga e enjtja, 31 korrik, deri të dielën më 3 gusht, në port kanë ardhur 24,373 pasagjerë dhe 6957 automjete.

Tragetet operuan me lundrime dyfishe, për të përmbushur kërkesën e lartë gjatë sezonit turistik.

APD theksoi se falë bashkëpunimit të ngushtë mes autoriteteve portuale, doganore, operatorëve privatë dhe sigurisë, operacionet u zhvilluan normalisht, me përqendrim të veçantë në përpunim efikas dhe pritje minimale për udhëtarët.

Prej fillimit të korrikut në Portin e Durrësit kanë nisur lundrimet për sezonin turistik 2025, një nga momentet më të rëndësishme për fluksin e udhëtarëve në linjat detare me Italinë.

Porti i Durrësit mbetet një pikë kyçe për udhëtimet detare të qytetarëve dhe turistëve, duke ofruar lehtësi në udhëtim dhe përmirësim të vazhdueshëm të shërbimeve portuale.