Ministri i Brendshëm Ervin Hoxha priti sot ambasadorin e Britanisë së Madhe në Tiranë, Nick Abbot.

Pas takimit, të mbajtur në Ministrinë e Brendshme, Hoxha bëri të ditur nëpërmjet një postimi në rrjetet sociale se “bashkëbisedimi u përqendrua në bashkëpunimin e vazhdueshëm mes dy vendeve në fushën e sigurisë, në kuadër të planit të përbashkët të masave, “Dialogu kundër Krimit të Organizuar dhe Krimeve të Rënda”, me theks të veçantë te prioriteti strategjik i rikuperimit të aseteve të përfituara nga veprimtaria kriminale”.

Hoxha theksoi se funksionalizimi i Zyrës së Rikuperimit të Aseteve është një nga rekomandimet kyçe të Bashkimit Europian dhe një element thelbësor i agjendës sonë të integrimit.

Në këtë drejtim, sipas Hoxhës, Ministria e Brendshme ka përfituar mbështetje të vazhdueshme nga partnerët.

“Mbështetja e Mbretërisë së Bashkuar në këtë fazë është një kontribut i çmuar për konsolidimin e këtij mekanizmi të ri institucional, si pjesë e zbatimit të Strategjisë Kombëtare kundër pastrimit të parave dhe financimit të terrorizmit 2024–2030”, tha Hoxha.

Hoxha shtoi se “diskutuam për mundësitë e zgjerimit të kësaj mbështetjeje, përmes: trajnimeve të avancuara për ekspertët e ZRA dhe bashkëpunëtorët institucionalë; mbështetjes për takime operacionale ndërkombëtare dhe rajonale; ndërtimit të kanaleve të drejtpërdrejta me homologët britanikë; zhvillimit të databazës analitike të rasteve të ZRA, në përputhje me standardet më të mira britanike”.

“Shqipëria mbetet plotësisht e angazhuar për të çuar përpara këtë proces jetik për forcimin e sundimit të ligjit dhe goditjen e krimit të organizuar, përmes ndjekjes së parave me burim të paligjshëm”, e përmbylli Hoxha reagimin.

Burimi ATSH