Kryeministri Edi Rama ndau mëngjesin e sotëm pamje nga dita e parë e dialogut për Bujqësinë dhe Zhvillimin Rural të zhvilluar në Cërrik.

Rama theksoi se kjo ditë ishte e gjatë dhe e frytshme me protagonistë nga të tëra fushat e zhvillimit bujqësor e rural.

“Mirë është që ne këtë lloj forumi ta mbajmë të ngritur, natyrisht mund ta pasurojmë, mund të vijnë dhe të tjerë. Të rishihemi pas disa muajsh për të parë çfarë është bërë, çfarë s’është bërë”, tha Rama.

Dialogu për Bujqësinë dhe Zhvillimin Rural përmbylli pasditen e djeshme punimet e ditës së parë, i cili u fokusua në dëgjimin aktiv të pjesëmarrësve, dhe evidentimin e temave më të rëndësishme për sektorin, e më pas në zhvillimin e tryezave të diskutimit.

Në fjalën e tij, Kryeministri Edi Rama theksoi se linja e kredisë 250 milionë euro e Bankës së Shqipërisë është një linjë kredie jokonvencionale që nuk ka interesat e një kredie që jep sot banka.

Rama foli edhe për “Paketën e Maleve”, që sipas kreut të qeverisë, “rrezikon të mbetet e pashfrytëzuar, nëse ne nuk i bashkojmë forcat për të dhënë informacion, për t’u linjëzuar me subjektet dhe duke u bërë ne aktivë, duke i kërkuar ne, kapacitetet në këtë proces”.

Burimi ATSH