Në Forumin e Shërbimeve Publike të Kombeve të Bashkuara që u mbajt në Samarkand, Uzbekistan, Shqipëria u vlerësua nga Organizata e Kombeve të Bashkuara, për arritjet në fushën e qeverisjes elektronike dhe digjitalizimit të shërbimeve publike, në mbështetje të Agjendës 2030 për Zhvillim të Qëndrueshëm.

Agjencia Kombëtare e Shoqërisë së Informacionit, njofton se ky vlerësim konfirmon angazhimin dhe rezultatet konkrete të Shqipërisë në transformimin e administratës publike përmes teknologjisë dhe inovacionit.

Sipas njoftimit të AKSHI-t, nga organizatorët u nënvizua se Shqipëria vazhdon të mbajë një renditje të lartë në Indeksin e Zhvillimit të Qeverisjes Elektronike (EGDI) në nivel rajonal, duke shënuar përparim të qëndrueshëm.

“Përmirësime të dukshme janë regjistruar edhe në Indeksin e Shërbimeve Online, falë zgjerimit të shërbimeve elektronike për qytetarët dhe bizneset. Një tjetër arritje lidhet me zhvillimin e infrastrukturës së telekomunikacionit, që garanton ofrimin efektiv të shërbimeve publike online”, thuhet në njoftim.

Forumi, bashkëorganizuar nga UN DESA dhe qeveria e Uzbekistanit, mblodhi rreth 1,000 pjesëmarrës nga e gjithë bota, ministra, vendimmarrës dhe profesionistë të administratës publike, për të shkëmbyer praktikat më të mira dhe për të nxitur qasje të reja transformuese.

Nga Shqipëria në këtë forum mori pjesë Nevila Repishti, e cila u angazhua në diskutimet për forcimin e qeverisjes elektronike dhe avancimin e transformimit digjital në shërbimet publike.

Sipas AKSHI-t, vëmendje e veçantë iu kushtua transformimit digjital dhe inovacionit në sektorin publik.

Në ceremoninë përmbyllëse, 12 vende u vlerësuan për rezultatet në qeverisjen elektronike, sipas UNEGovernmentSurvey2024.

Burimi ATSH