Zëvendësministri i Brendshëm, Besfort Lamallari prezantoi sot para komisionit për Politikën e Jashtme disa shtesa dhe ndryshime në ligjin “Për të huajt”.

Lamallari nënvizoi se nisma synon të përmirësojë fushën e të drejtave të migrantëve, anëtarëve të tyre të familjes, refugjatëve dhe azilkërkuesve si dhe të mbrojtjes sociale, duke ofruar akses në programe dhe shërbime integrimi.

“Synohet ofrimi më i mirë i informacionit dhe procedurave të lehtësuara dhe afateve të shkurtuara si dhe forcimit institucional të ofrimit të shërbimeve për migrantët”, shtoi ai.

Zv.ministri i Brendshëm bëri të ditur po ashtu se projektligji vjen edhe si parashikim i strategjisë kombëtare për migracionin si dhe adreson edhe objektivat e planit kombëtar për integrimin europian.

“Projektligji synon garantimin e një mjedisi më miqësor për investitorët e huaj, migrantët dhe azilkërkuesit. Bëhet fjalë për leje për punonjës shumë të kualifikuar dhe ndryshimet në ligj vijnë në parametrat e përcaktuara nga pakti i ri për migracionin”, shtoi ai.

Lamallari nënvizoi se përmes kësaj nisme shkohet më tej në drejtim të forcimit të kapaciteteve të institucioneve që merren me menaxhimin e migracionit në Shqipëri.

“Fokusi përmes kësaj nisme i jepet forcimit të të drejtave dhe garancive që duhet të gëzojë çdo migrant, azilkërkues dhe refugjat dhe familjarët e tyre sipas standardeve të BE-së”, tha zv.ministri.

Nga ana tjetër, Lamallari u ndal te përfitimet e shtetit shqiptar, përmes lehtësive që krijohen në procedura dhe afate për kategori shumë specifike punonjësish që synohet të tërhiqen për tregun e punës.

Konkretisht, Lamallari nënvizoi se bëhet fjalë për punonjës shumë të kualifikuar apo edhe kërkues shkencorë, apo lehtësimi i procedurave për personat që konsiderohen si investitorë të huaj.

Lidhur me nevojat për identifikimin e saktë të këtyre punonjësve, Lamallari bëri të ditur se kjo bëhet në bashkëpunim me gjithë institucionet, si policia kriminale dhe Shërbimi Informativ Shtetëror.

“Në gjithë nismën prej 60 nenesh kemi synuar në thelb të përafrojmë kuadrin ligjor ekzistues me direktivat dhe standardet e BE-së. Për dëbimet, për çdo person të huaj që konsiderohet i padëshiruar në vendin tonë merren masat e nevojshme për të garantuar dëbimin, veçanërisht kur cenohet siguria publike dhe kombëtare”, shtoi ai.

Burimi ATSH