Ministri për Evropën dhe Punët e Jashtme, Igli Hasani zhvilloi takim me zv.kryeministrin dhe homologun e tij të Punëve të Jashtme të Moldavisë, Mihai Popșoi.

Hasani e cilësoi diskutimin të frutshëm, ndërsa informoi se takimi u mbajt në kuadër të Ministerialit të Procesit të Bashkëpunimit të Evropës Juglindore (#SEECP) në Tiranë.

“Ritheksuam rëndësinë e thellimit të dialogut politik dhe zgjerimit të bashkëpunimit ekonomik në fusha me interes të përbashkët”, shkroi kryediplomati shqiptar në rrjetet sociale ku solli edhe momente nga takimi.

Shqipëria përmbylli me sukses Presidencën e saj të Procesit të Bashkëpunimit në Evropën Juglindore (SEECP) për periudhën korrik 2024 – qershor 2025, me moton “Formësojmë të ardhmen tonë evropiane”.

Dje, Tirana u bë sërish qendër e diplomacisë rajonale, duke mirëpritur krerë shtetesh dhe përfaqësues të lartë nga 13 vende pjesëmarrëse në ministerialin përmbyllës.

Burimi ATSH