Në mbyllje të fushatës elektorale të Partisë Socialiste sot në Tiranë, Drejtuesi Politik për Diasporën, Taulant Balla, falënderoi veçanërisht emigrantët shqiptarë për rolin vendimtar në këtë proces zgjedhor.

“Motra dhe vëllezër, shumë faleminderit për këtë mbështetje spektakolare këtu në Tiranë, por dua një duartrokitje për diasporën. Plot 200 mijë e më shumë motra e vëllezër në diasporë e kanë shtruar tanimë fitoren e Partisë Socialiste”, u shpreh Balla.

Ai theksoi se kjo do jetë një fitore më e fortë se të tre mandatet e mëparshme të PS, duke u bërë thirrje qytetarëve që ndodhen ende jashtë vendit të mos humbasin orët e fundit të votimit, veçanërisht në Greqi.

“Nesër në Greqi në mëngjes, nxitoni, çojini dhe ju ato pak vota që kanë mbetur për ta shtuar fitoren tonë si asnjëherë tjetër,” vijoi ai.

Balla nënvizoi se falë udhëheqjes së Edi Ramës, Shqipëria ka fituar respekt dhe dinjitet, duke e afruar flamurin shqiptar drejt Bashkimit Europian. “Tani kemi mundësinë që flamurin tonë ta ngremë në oborrin e Bashkimit Europian”, përfundoi ai mes duartrokitjeve.

Burimi ATSH