Kryeministri, njëherësh kryetari i Partisë Socialiste, Edi Rama zhvilloi sot një takim elektoral në Pogradec.

Në fjalën e tij, Rama u shpreh se, “4 vjet më parë kemi thënë se ky do të jetë mandati i Pogradecit” dhe shtoi Rama “në të vërtetë ky ishte mandati i Pogradecit”.

“Transformimi i Pogradecit është në sytë e të gjithëve. Mbështetja jonë ka qenë e pakursyer”, nënvizoi Rama, por shtoi ai, “gjithë ky transformim nuk do të ishte i mundur pa kryebashkiakun e Pogradecit Ilir Xhakollin”.

“Ilir ka qëndruar mbi kokë të çdo punë, është marrë me çdo detaj. Ka pasur durim të madh deri sa arriti ta tërheqë kërrabën nga Pogradeci. Por e vërteta është se në të gjitha drejtimet Pogradeci mund të konsiderohet sot një nga pasqyrat më kuptimplota të rilindjes që ne kemi çuar në të gjithë Shqipërinë”, tha Rama.

Rama kujtoi se, “kemi nisur këtë rrugëtim së bashku me rrugën për të ardhur në Pogradec që nuk ishte një rrugë hyrje në një qytet turistik, por ishte një korridor mes godinash pa leje të cilat krijonin një mur të shëmtuar që nuk të lejonte të shikoje bukurinë e liqenit”.

“Besoj ju kujtohet se çfarë beteje kemi bërë me kënetën se na i nxori të tëra speciet aty tek rruga. Nuk donin që ne të shembnim të vjetrën për t’i hapur rrugë të resë. Por pavarësisht këtyre vështirësive rruga hyrëse e Pogradecit është një nga rrugët më të bukura panoramike sot dhe besoj e keni parë dhe zë vend hera herës në të gjitha reportazhet që bëhen për Shqipërinë turistike jashtë Shqipërisë”, tha Rama.

Nga ajo hyrje, shtoi Rama, “filloi e gjithë një punë që mund ta prekësh në çdo pjesë të trupit të Pogradecit por edhe në të gjitha drejtimet e jetës së komunitetit”.

Duke i kthyer përgjigje të gjithë atyre që thonë nuk ka ujë, nuk ka bukë, nuk ka drita, Rama theksoi se, “sot kanë mbetur vetëm një grusht i vogël fshatrash, ndërkohë që pjesa dërrmuese, jo vetëm e qytetit, por e të gjitha fshatrave furnizohet me ujë të pijshëm dhe projekti aq shumë i munguar dhe aq shumë i pritur për ujin e pijshëm tanimë është realitet”.

Burimi ATSH