Kryeministri Edi Rama, njëherësh kryetar i Partisë Socialiste ishte sot në Devoll ku prezantoi arritjet kyçe të qarkut Korçë për sektorët më të rëndësishëm dhe sfidat e Shqipërisë 2030 në BE.

Gjatë fjalës së tij Rama u ndal edhe tek investimet e kryera në qarkun e Korçës nga qeveria socialiste përgjatë këtyre viteve.

Rama tha se në infrastrukturë janë investuar 324 milionë euro për 136 projekte.

“Një pasqyrë e përgjithshme e gjithë investimeve dhe transformimeve që është bërë në çdo qark është e rëndësishme për t’u ndarë me ju për të kuptuar sa shumë është bërë dhe sa bazë të mirë kemi krijuar për të shkuar më tej”, theksoi Rama.

“Infrastruktura rrugore, kjo për mua është shumë e rëndësishme, por të dëgjosh dhe lexosh çfarë thotë Shqipëria e kënetës në Shqipëri nuk ka rrugë, ndërkohë që ka akoma probleme, por të tëra këto damarë që janë me jeshile janë rrugët e asfaltuara dhe të verdhë rrugët e bardha, që janë rragë që përdoren dhe në Evropë për zonat e thella rurale, janë 325 kilometra të investuara nga ne dhe duke mbështetur bashkitë dhe 163 projekte, 324 milionë euro kemi investuar për qarkun e Korçës për gjithë çfarë ka rrugë të brendshme qytet apo fshat”, tha Rama.

Sa i përket rigjenerimit urban, Rama tha janë investuar 34.6 milionë euro për 126 projekte.

I ndalur tek investimet në turizëm dhe mjedis, Rama tha se janë investuar 40 milionë euro për 35 projekte.

“40 milionë euro ka investuar kjo shumicë qeverisëse për Turizmin dhe Mjedisin dhe për t’i mbledhur bashkë turizëm dhe mjedis të investuara në qarkun e Korçës duhet të mblidhni bashkë të gjitha vitet e qeverive dhe të shtyheshit deri nga viti ‘70 dhe s’jam i sigurt që bëhen aq shumë”, tha Rama.

Rama tha më tej “ujësjellës kanalizime, ka problematika por ama 1001 projekte Ujësjellës Kanalizime kemi bërë në qarkun e Korçës për 113 milionë euro”.

Sa i përket infrastrukturës energjetike Rama tha se “për përmirësimin e shpërndarjes dhe rritjen e cilësisë së transmetimit janë 31 milionë euro për 65 projekte”.

Për bujqësinë, Rama tha janë “55 milionë euro, i takon se është një nga qarqet avangard në bujqësi, janë 118 projekte të mbështetur nga qeveria”.

“Shkolla, kopshte, terrene sportive 114 projekte, 36 milionë euro”, tha Rama më tej.

Në kulturë, Rama tha se janë investuar “20.3 milionë euro për kulturë, qeveritë e mëparshme nuk i kanë harxhuar për buxhetin kombëtar ne ia kemi dhënë vetëm qarkut Korçë”.

“Këtu jemi te qendra shëndetësore, jemi në 18 milionë euro për 80 projekte” tha Rama.

Në përfundim kontributi i përgjithshëm i qeverisë për qarkun e Korçës tha Rama është “673 milionë euro dhe këtu nuk hyjnë rrugët kombëtare”.

Burimi ATSH