Kryeministri Edi Rama, njëherësh kryetar i Partisë Socialiste konfirmoi sot se është 11-fishuar numri i fermerëve që kanë përfituar mbështetje financiare nga shteti.

Në një takim me fermerët në Berat, Rama theskoi se ndërkohë qeveria po synon të shkojë në një nivel tjetër mbështteje për fermerët.

“Ne duam të rrisim mbështetjen pavarësisht se ka numra pozitivë shumëfishimesh qoftë në mbështetje financiare, qoftë në numër përfituesish. Është 11-fish numri i përfituesve. Janë rreth 67 mijë përfitues në raport me 5600 fermerë përfitues që ishte numri që ne kemi gjetur kur kemi marrë detyrën”, tha Rama.

Kryeministri theksoi se qeveria po nxit mbështetjen financiare në funksion të bashkimit dhe rritjes së ndërveprimit të fermerëve dhe pikave të grumbullimit dhe përpunimit.

“Sot më vjen shumë mirë që kemi në dispozicion për ju një instrument të ri financiar, 250 milionë euro linjë financimi inovative e Bankës së Shqipërisë që ju mundëson të gjithë sipërmarrësve në fshat apo atyre që duan të nisin sipërmarrje, qoftë në prodhim apo në agropërpunim, grumbullim dhe agroturizëm, që të marrin kredi me 70% kolateral të garantuar nga shteti dhe me një normë interesi më pak se 3%”, tha Rama.

Kryeministri theksoi se nëpërmjet AZHBR-së që e shoqëron këtë proces, qeveria mbështet këdo që ka nevojë për asistencë.

Burimi ATSH