Kryetarja e Kuvendit, Elisa Spiropali mori pjesë sot në ceremoninë e përcjelljes së atdhetarit Haxhi Thaçi, babait të ish-Presidentit të Kosovës Hashim Thaçi.

Në ceremoninë e zhvilluara sot në Skënderaj, Spiropali e konsideroi fillimisht padrejtësi politike e kombëtare mbajtjen në paraburgim të Hashim Thaçit dhe luftëtarëve të tjerë të Ushtrisë Çlirimtare të Kosovës.

Ndërsa mungesa e Hashim Thaçit në ceremoninë mortore, Për Spiropalin është padrejtësi njerëzore e morale.

“Shumë i dashur Hashim, që na mungon në këtë përcjellje të babait tënd fizikisht, sepse padrejtësisë politike e kombëtare të burgosjes tënde e luftëtarëve të tjerë, sot iu shtua edhe një padrejtësi njerëzore e morale”, tha ajo.

Në fjalën e saj, Spiropali vlerësoi Haxhi Thaçin ndërsa shtoi se ai është shembulli sesi një njeri i thjeshtë mund të bëhet një atdhetar i madh.

“Haxhi Thaçi, ky burrë i shtrirë para nesh dhe për të cilin morëm të gjithë rrugën për këtu në Skënderaj, është shembulli sesi një njeri i thjeshtë mund të bëhet një atdhetar i madh. Kjo është e mundur kur urtësia, njerëzillëku, ndershmëria, lidhjet e forta me njerëzit dhe përkushtimi i përditshëm i një burri që duket i zakonshëm, shumëfishohen, ndriçojnë dhe frymëzojnë përkushtimin dhe sakrificat për atdheun, për kombin”, tha Spiropali.

Por, sipas saj, “Haxhi Thaçi ishte më shumë se kaq”.

“Përkujdesja prindërore, edukata patriotike, devocioni i këtij plaku që u udhëhoq gjithë jetën nga fryma e së drejtës dhe frymëzimi prej lirisë, i dhanë Kosovës një komandant e luftëtar, një udhëheqës vizionar, Kryeministrin e parë e pastaj edhe Presidentin e Kosovës së pavarur. Prandaj Haxhi Thaçi ishte, jeton dhe do të jetojë në birin dhe shëmbëlltyrën e vet, Hashim Thaçin, dhe në pasardhësit e tij”, shtoi Spiropali.

“Faleminderit, burrit dhe patriotit Haxhi Thaçi, që na dhe Hashim Haxhi Thaçin, udhëheqësin politik të Ushtrisë Çlirimtare të Kosovës, lufta e së cilës, me mbështetjen e popullit të vet, Shteteve të Bashkuara të Amerikës dhe NATO-s, e ka bërë Kosovën prej 26 vjetësh një shtet të lirë dhe prej 17 vjetësh një shtet të pavarur. Nuk i bën nder askujt, përveçse armiqve të lirisë, fakti që Hashim Thaçi dhe udhëheqësit kryesorë të UÇK-së janë sot në ‘shtatë penxheret’ e Hagës”, vijoi ajo.

Spiropali theksoi se ata janë viktima të një drejtësie që po bëhet përditë e më tepër një iluzion dhe përditë e më tepër po shkallmon vlerat, parimet dhe standardet ndërkombëtare të drejtësisë dhe injoron e margjinalizon institucionet sovrane të shtetit të lirë e sovran të Kosovës.

“Dhe që amoralitetit dhe falsitetit të vet i vuri vulën me ndalimin e të burgosurit padrejtësisht dhe kundraligjërisht, Hashim Thaçit, për t’i dhënë lamtumirën babait të vet. Baca Haxhi, në vend të Hashimit kemi ardhur të të përcjellim ne të gjithë, nga Shqipëria dhe gjithë shqiptaria. Të qoftë i lehtë dheu i Burojës, dheu i Skënderajt, dheu i Kosovës! Të kam sjellë edhe një dorë nga dheu i Shqipërisë! Lamtumirë!”, tha Spiropali në fjalën e mbajtur në këtë ceremoni mortore.

Burimi ATSH