Kryekomisioneri Shtetëror i Zgjedhjeve, Ilirjan Celibashi bëri të ditur sot se i ka propozuar Komisionit Rregullator përdorimin e pajisjeve elektronike të votimit dhe numërimit (PEVN) për zgjedhjet e 11 majit 2025.

Përmes një postimi në rrjetet sociale, Celibashi thekson se propozimi përfshin tre skenarë për zbatimin e votimit dhe numërimit elektronik.

Skenari i parë, sipas tij, përfshin pajisjet elektronike të votimit dhe numërimit (PEVN) në njësitë administrative nr. 1, 3, 5, 8, 9, 10 (Tiranë) dhe në Bërxull, Prezë, Vorë (Vorë).

Ndërkohë Celibashi pohoi se skenari i dytë përfshin vendosjen e PEVN në njësitë administrative nr. 2, 3, 5, 9, 10 (Tiranë) dhe në Bërxull, Prezë, Vorë (Vorë).

Skenari i tretë, sipas kryekomisionerit Shtetëror të Zgjedhjeve përfshin vendosjen e PEVN në njësitë administrative nr. 5, 10 (Tiranë), Bërxull, Prezë, Vorë (Vorë) dhe në Durrës R1, R5 (Durrës).

Celibashi theksoi se këto do të jenë zgjedhjet e katërta radhazi me PEVN, duke konfirmuar saktësinë 100% të procesit.

Votimi dhe numërimi elektronik u provua për herë të parë në zgjedhjet e vitit 2021, në njësinë administrative numër 10 në Tiranë, ndërsa në zgjedhjet e vitit 2023, u zbatua edhe në bashkitë Elbasan, Kamëz dhe Vorë.