Kryeministri Edi Rama deklaroi sot se, do të fillojë një operacion si ai që u bë me pagesat e energjisë elektrike edhe për pagesën e kontributeve shoqërore dhe shëndetësore.

Në një vizitë në shkollën profesionale “Beqir Çela” në Durrës, Rama ndër të tjera foli për edhe pagesën e kontributeve.

Kryeministri u shpreh se, nuk mund ta lëmë në këtë fazë rritjen ekonomike që të mos përfshijë edhe pensionistët.

Rama tha se, “kjo që ndodh tani me arsimin profesional, ky ndryshim që ka filluar është baza që në 5 vite skema të fillojë të marrë frymë edhe sepse do të fillojmë një operacion si ai i energjisë që bëmë atëherë, do ta fillojmë edhe me kontributet shoqërore dhe shëndetësore sepse është e papranueshmë që të bëhet evazion me këto dy pika më bazike që i kemi më të ulëtat në rajon”.

Rama tha se, “sigurimet shoqërore dhe sigurimet shëndetësore në pagën e punonjësve tanë janë më të ulëtat në rajon”.

“Tani taksë fitimi për biznesin e vogël s’ka, si askush në rajon. TVSH deri në 100 mijë euro xhiro në vit s’ka. Sigurimet shoqërore më të ulëtat, sigurimet shëndetësore më të ulëtat. Po nga do të dalin të gjitha ato të ardhura për ti bërë të gjitha dhe plus për të mbështetur rritjen e pensioneve, që gjithsesi do duhet ta mbështesim në këtë fazë, pjesërisht nga buxheti i shtetit”, tha Rama.

Rama shtoi se, nuk mund ta lëmë në këtë fazë rritjen ekonomike që të mos përfshijë edhe pensionistët.

“Se po i përfshin të gjithë faktikisht. Mësuesit kanë shkuar me 950 euro mesataren e pagës. Punonjësit në sektorin publik në total janë 900 euro mesatarja e pagës. Që janë shumë në raport me çfarë ishin, por që nuk janë shumë në raport me ç’duhet të jenë, pra duhen rritur dhe ato.

Kreu i qeverisë theksoi se, “në sektorin privat pagat reale janë shumë më të larta se ato që deklarohen, që është një problem që vazhdon të ekzistojë megjithëse është përmirësuar shumë deklarimi”.

“Dhe pensionistët janë të vetmit që nuk kanë prekur një gjë direkte nga kjo rritje ekonomike. Pra është një rritje ekonomike që nuk mund të quhet inkluzive komplet meqenëse nuk përfshin dhe këta. Dhe ne nuk mund ta lëmë këtë kategori jashtë. Por që këtu ka një sërë gjërash që duhen atakuar dhe duhen goditur dhe duhen korrigjuar kjo nuk diskutohet dhe të gjithë duhet të jenë të vetëdijshëm për këtë, se nuk mund të jetë kështu. Shkojmë në punë, marrim rrogën, nuk paguajmë sigurime shoqërore dhe pastaj ankohemi pse të moshuarit në shtëpi nuk kanë pension më të lartë”, tha Rama.

(Marrë nga ATSH)