Mbështetja për anëtarësimin në BE mbetet e fortë në Shqipëri dhe besimi në bashkëpunimin rajonal në Ballkanin Perëndimor është më i lartë se kurrë më parë.

Ambasadori i Bashkimit Evropian në Tiranë, Silvio Gonzato në fjalën e tij sot në prezantimin e Barometrit Ballkanik të edicionit të vitit 2024 në Tiranë theksoi se, korrupsioni mbetet ndër tre shqetësimet kryesore për të rinjtë shqiptarë.

Ai nënvizoi se, shqiptarët janë veçanërisht të motivuar dhe ambiciozë për të avancuar shpejt në rrugën e BE-së.

“Korrupsioni mbetet ndër tre shqetësimet kryesore për të rinjtë shqiptarë, duke theksuar nevojën për të çuar përpara reformat thelbësore në rrugën e anëtarësimit në BE. Mbështetja për BE-në si bashkim vlerash është e fortë, shqiptarët janë veçanërisht të motivuar dhe ambiciozë për të avancuar shpejt në rrugën e BE-së dhe Plani ynë i Rritjes ofron përfitime të qarta për përparimin e ardhshëm ekonomik dhe social”, tha ambasadori i BE-së, Silvio Gonzato.

Këshilli i Bashkëpunimit Rajonal (RCC) prezantoi sot në Tiranë edicionin e 10-të të Ballkan Barometrit, sondazhi më i madh i opinionit publik dhe i biznesit në rajon.

Shqipëria dhe Kosova diku me 79 % dhe 77% mbështesin procesin e integrimit.

Qytetarët e rajonit sipas sondazhit, këtë vit evidentojnë çmimet e larta si shqetësimi kryesor. Gjithsesi shqiptarët mbeten optimist për të ardhmen, me 38 për qind që presin përmirësim të situatës së tyre financiare dhe vetëm 14, përkeqësim.

Ky sondazh vjetor është kryer me gjashtë mijë njerëz dhe 1200 biznese nga i gjithë Ballkani Perëndimor.

(ATSH)