Sekretari i Shtetit për Çështjet e Jashtme, Commonwealth-it dhe Zhvillimit të Mbretërisë së Bashkuar Lord David Cameron deklaroi sot se, në rast se ka probleme në Ballkanin perëndimor atëherë ka probleme dhe në Evropë

Në një deklaratë të përbashkët për shtyp me kryeministrin Edi Rama, Cameron u shpreh se, kur Ballkani Perëndimor ia del mbanë atëherë Evropa ia del mbanë.

“Faleminderit për atë që thatë që unë jam mik i Ballkanit Perëndimor dhe i rajonit. Në fakt për mua ky është kompliment vërtet i madh”, iu drejtua Cameron kryeministrit Rama.

“Në fakt unë kam një këndvështrim shumë të drejtë dhe të thjeshtë që kur Ballkani Perëndimor ia del mbanë atëherë Evropa ia del mbanë. Në rast se ka probleme në Ballkanin Perëndimor atëherë ka probleme dhe në Evropë”, tha Camreon.

Sepse, shtoi ai, “në fakt është në interesin tonë të përbashkët që të ndihmojmë me procesin e paqtimit, të rritjes ekonomike dhe të mirëkuptimit dhe për mua kjo është përparësi dhe ka qenë përparësi dhe kur kam qenë kryeministër dhe në këto muaj unë do të vijoj me këtë punë”.

Cameron foli edhe për takimin që do të mbahet në Mbretërinë e Bashkuar më 18 korrik.

“Jam vërtetë shumë i kënaqur që ju do të vini në takimin që do të bëhet në 18 korrik, siç e thatë edhe ju, jo në qershor, se desh u shqetësova. Në fakt do të ndodhë në “Blenheim Palace”, jo në Londër. Në “Pallatin Blenheim” në zonën zgjedhore ku unë kam qenë deputet dhe është një nga ndërtesat më të mrekullueshme që kemi në Mbretërinë e Bashkuar. Do të jetë një takim shumë, shumë i rëndësishëm jo vetëm për të gjitha vendet e BE, por edhe për vende si Shqipërisë, si Mbretëria e Bashkuar, të cilat duan që të kenë një marrëdhënie pozitive dhe të fortë në të gjithë kontinentin tonë”, tha ai.

Pra, theksoi Cameron, “do të flasim për të gjitha këto çështje, mund të jetë migracioni, mbështetja që i japim Ukrainës, ose çështje që kanë të bëjnë me stabilitetin, rritjen ekonomike, sukseset këtu në Ballkan”.

“Ka qenë mrekulli që kam qenë këtu sot dhe që kemi bërë bashkëbisedimin sot dhe sigurisht që do ta mbaj premtimin dhe do të rikthehem për diskutime të mëtejshme gjatë vitit. Por me të vërtetë që ka qenë kënaqësi që kam ardhur dhe që kemi bashkëbiseduar me njeri-tjetrin dhe urime për gjithçka që kemi arritur”, përfundoi fjalën e tij Sekretari i Shtetit për Çështjet e Jashtme, Commonwealth-it dhe Zhvillimit të Mbretërisë së Bashkuar Lord David Cameron.

(Marrë nga ATSH)