Ministri i Ekonomisë, Kulturës e Inovacionit, Blendi Gonxhja, u nderua me vlerësimin “Njeriu i Vitit” në CCIT Awards, organizuar nga Dhoma e Tregtisë dhe Industrisë Tiranë në 127-vjetorin e krijimit të saj.

Gonxhja ndau në rrjete sociale foto nga ky moment i eventit, teksa citoi motivacionin e çmimit: “për një vlerësim të çmuar për punën dhe kontributin në shërbimet e transportit rrugor, kthyer në institucion model për cilësinë e shërbimeve publike, ku gjatë vitit 2023 një sërë nismash me impakt domethënës në lehtësimin dhe përmirësimin e shërbimeve për qytetarët u materializuan në risi e investime të prekshme nga të gjithë, në infrastrukturë dhe digjitalizim, duke i kursyer qytetarëve 35 milionë euro/vit nga ulja e barrës tarifore, thjeshtimi i procedurave dhe nga koha e kilometrat e evituara nga riinxhenierimi i shërbimeve dhe afatet e rishikuara”.

“Nuk do të mund t’i realizonim këto arritje pa besimin, mbështetjen shumëvjeçare dhe frymën bashkëpunuese të Kryeministrit, Edi Rama e Zv.Kryeministres dhe Ministres së Infrastrukturës dhe Energjisë Belinda Balluku , si dhe pa dedikimin e ekipit kampion të DPSHTRR”, tha Gonxhja.

Sipas tij, sfidat e nisura në DPSHTRR, si dhe kjo mirënjohje e përsëritur nga komuniteti i sipërmarrjes shqiptare, krahas perceptimit të qytetarëve si përfitues direkt, bëhen udhërrëfyes dhe motivim për misionin që mu besua në pozicionin e ri si Ministër i Ekonomisë, Kulturës e Inovacionit.