Prezenca e OSBE-së në Shqipëri, në bashkëpunim me Zyrën e Këshillit të Evropës në Tiranë dhe me Ministrinë e Drejtësisë, organizoi dje një tryezë të rrumbullakët për promovimin e masave alternative ndaj arrestit në burg.

Në të morën pjesë rreth 30 përfaqësues të institucioneve të ndryshme të drejtësisë, përfshirë gjyqtarë, prokurorë, avokatë, përfaqësues të organeve ligjzbatuese, Drejtorisë së Përgjithshme të Burgjeve dhe Shërbimit të Provës.

Tryeza ofroi një platformë për shkëmbimin e pikëpamjeve mbi përdorimin aktual të arrestit në burg në Shqipëri, diskutimin e sfidave praktike në zbatimin e masave alternative ndaj heqjes së lirisë dhe identifikimin e mundësive për forcimin e përdorimit të tyre në përputhje me standardet evropiane dhe ndërkombëtare për të drejtat e njeriut.

Diskutimet theksuan rëndësinë e të siguruarit që heqja e lirisë para gjykimit të përdoret vetëm kur është e nevojshme dhe proporcionale, ndërsa në rastet individuale të merren në konsideratë alternativa efektive.

Në hapje, kryetari i Prezencës së OSBE-së në Shqipëri, ambasadori Michel Tarran, tha: “Ulja e numrit të vendimeve gjyqësore për arrestin në burg nuk do të thotë qasje më e butë ndaj krimit. Ajo ka të bëjë me garantimin që masat të jenë të nevojshme, proporcionale dhe efektive. Siguria publike dhe të drejtat e njeriut nuk janë objektiva që përjashtojnë njëra-tjetrën. Një sistem drejtësie që e përdor arrestin në burg me kujdes, që i arsyeton qartë vendimet e tij dhe që përdor në mënyrë efektive alternativat mund t’i forcojë të dy këta objektiva”.

Në takim folën edhe kreu i Zyrës së Këshillit të Evropës në Tiranë, Giulia Re, zëvendësministrja e Drejtësisë, Elona Hoxha, drejtori i përgjithshëm i Burgjeve, Adriatik Kupi dhe drejtori i Inspektimit i Shërbimit të Provës, Eriant Kulluri.

Pjesëmarrësit në tryezë shqyrtuan çështje praktike që lidhen me vendimmarrjen gjyqësore, vlerësimin e rrezikut, mbikëqyrjen dhe bashkëpunimin ndërmjet gjykatave, prokurorive, shërbimit të provës dhe institucioneve të tjera përkatëse.

Vëmendje e veçantë iu kushtua lidhjes ndërmjet përdorimit të paraburgimit dhe mbipopullimit në burgje. Kufizimi i paraburgimit të panevojshëm ose të zgjatur dhe përdorimi më i gjerë i masave të përshtatshme alternative ndaj heqjes së lirisë mund të kontribuojnë në uljen e presionit mbi institucionet e vuajtjes së dënimit, duke mbështetur njëkohësisht administrimin efektiv të drejtësisë dhe respektimin e parimit të prezumimit të pafajësisë.

Shkëmbimi i pikëpamjeve nënvizoi nevojën për një ndryshim në kulturën gjyqësore, zhvillim të vazhdueshëm profesional, arsyetim gjyqësor të qëndrueshëm dhe bashkëpunim më të fortë ndërinstitucional, me qëllim që alternativat ndaj paraburgimit të zbatohen në mënyrë efektive.

Tryeza e rrumbullakët është pjesë e përpjekjeve dhe e mbështetjes së vijueshme të Prezencës së OSBE-së në Shqipëri për forcimin e shtetit të së drejtës, mbrojtjen e së drejtës për liri dhe siguri dhe mbështetjen e një sistemi të drejtësisë penale që përdor në mënyrë proporcionale dhe efektive masat e heqjes së lirisë dhe masat alternative.

Prezenca e OSBE-së mbetet e angazhuar për të mbështetur institucionet shqiptare përmes trajnimit gjyqësor, reformës penitenciare, forcimit të shërbimeve të provës dhe promovimit të alternativave ndaj heqjes së lirisë.

Burimi ATSH