Presidenti Bajram Begaj deklaroi sot se “Bullgaria ka qenë avokatja më e mirë për procesin e integrimit në Bashkimin Evropian të Shqipërisë”.

Në konferencën e përbashkët për shtyp me Presidentin e Bullgarisë, Rumen Radev, Begaj tha se “Bullgaria e ka kryer misionin e vet dhe ne duhet të jemi mirënjohës për mbështetjen e saj”.

Më tej Begaj u shpreh se “procesi i integrimit është i lidhur me disa kritere që duhen plotësuar dhe i bazuar në meritë. Besoj se të gjitha vendet aspirante që duan të anëtarësohen duhet që këto kritere t’i plotësojnë duke realizuar reforma, të cilat janë shumë të rëndësishme për të realizuar”.

“Ëndrra e shqiptarëve dhe aspirata e tyre prej 32 vitesh është të bëhen pjesë e BE-së dhe është punuar jashtëzakonisht fort për arritjen e përmbushjes së kritereve”, nënvizoi Begaj, duke shtuar se është punuar gjithashtu për të qenë gati për të hapur kapitujt e parë të negociatave.

Presidenti Begaj tha se “procesi i zgjerimit është një investim gjeostrategjik i BE-së, ndërsa për ne shqiptarët është jetik e strategjik, një ëndërr për t’u përmbushur që lidhet lidhet edhe me procesin e paqes, sigurisë zhvillimit të qëndrueshëm e prosperitetit”.