Në ambientet e Komitetit Olimpik Kombëtar Shqiptar (KOKSH) u firmos sot memorandumi i bashkëpunimit me Komitetin Olimpik të Malit të Zi.

Delegacioni malazez kryesohej nga presidenti i Komitetit Olimpik të Malit të Zi, Dusan Simonovic dhe sekretari i përgjithshëm, Igor Vusurovic.

Pas ceremonisë, presidenti i KOKSH-it, Fidel Ylli sqaroi se, deri në fund të muajit dhjetor do të jenë firmosur të gjitha marrëveshjet e bashkëpunimit për shkëmbimin e eksperiencave mes vendeve.

Krerët e delegacionit malazez vlerësuan nga ana tjetër rolin e KOKSH-it dhe idesë për të krijuar lojëra rajonale duke e quajtur një hap përpara për të ardhmen e këtyre vendeve.

Në përmbyllje të takimit, të dyja delegacionet ndanë pikëpamjet e tyre lidhur me shkëmbimin e eksperiencave në sporte të ndryshme si noti, volejbolli, water-polo dhe basketbolli. (ATSH)