Zëvendëskryeministrja, njëherësh ministre e Infrastrukturës dhe Energjisë, Belinda Balluku, gjatë vizitës zyrtare që po zhvillon në Romë, Itali, mori pjesë së bashku me ministrin për Energjinë dhe Ambientin, Gilberto Pichetto Fratin, në organizimin e tryezës për energjinë, me faktor të këtij sektori nga të dyja vendet, në kuadër të Komitetit Ekonomik të Përbashkët zhvilluar një muaj më parë.

Zv/kryeministrja Balluku bëri të ditur se gjatë takimit u diskutua konkretisht mbi axhendën e përbashkët për hapat që duhen marrë deri në vitin 2030 sa i takon dekarbonizimit, investimet në energjinë e rinovueshme, por edhe mbi projektin për ndërtimin e linjës së interkonjeksionit që do të lidhë direkt Shqipërinë dhe Italinë.

“Shprehëm gjithashtu gatishmërinë e përbashkët për të intensifikuar më tej bashkëpunimin, ku eksperienca dhe mbështetja e Italisë është shumë e rëndësishme për vendin tonë. Në pranverën e vitit të ardhshëm, kur në Tiranë do të mbahet takimi i radhës, jemi besimplotë se do të finalizohet me nënshkrimin e disa marrëveshje të rëndësishme”, theksoi Balluku.