Kryeministri Edi Rama tha se qeveria e tij nuk do të tërheqë mbështetjen e saj për dy projekte resortesh luksoze të mbështetura nga kompania e investimeve e Jared Kushner, pavarësisht javëve të protestave të përditshme kundër tyre, shkruan sot Gresa Kraja për prestigjiozen ekonomike ”Bloomerg”.

Rama tha se është detyra e tij të bëjë dallimin midis demonstratave të vërteta dhe teatrit politik, në komentet me shkrim të dërguara sot në ”Bloomberg News”.

”Votuesit”, tha ai ”më dhanë një mandat të fortë në zgjedhjet e vitit të kaluar për të vazhduar me vizionin për ta shndërruar vendin në një destinacion turistik premium dhe të mos qeverisë me hashtag ose me jehonën më të zhurmshme”.

Projektet, të mbështetura nga kompania e investimeve e Kushner, ”Affinity Partners”, janë bërë një fokus i zemërimit më të gjerë për zhvillimin bregdetar të Shqipërisë dhe mënyrën se si miratohen investimet e mëdha private.

Protestuesit duan që planet të anulohen dhe Rama të japë dorëheqjen.

”As një pakicë e zhurmshme, e bashkuar nga çdo forcë opozitare, as një valë zemërimi e amplifikuar digjitalisht, e nxitur nga magjepsja globale me emrin Trump të lidhur me atë që unë besoj se është një mundësi e jashtëzakonshme për Shqipërinë (dhe e amplifikuar më tej nga ndërhyrja e aktorëve të huaj keqdashës) nuk do të na largojë nga zbatimi i Vizionit tonë Shqipëria 2030”, tha Rama.

Demonstratat filluan në fund të majit, kur filluan punimet përgatitore në gadishullin e Zvërnecit dhe bashkëshortja e Kushnerit, Ivanka Trump, diskutoi planet e saj për të zhvilluar ishullin e Sazanit në një podcast.

Që atëherë, Rama ka pohuar vazhdimisht, pa dhënë prova, se protestat mbështeten nga ”një ekosistem i madh i amplifikimit digjital që qartësisht nuk është organik”.

Në emailin e tij, ai tha se ”koha do të tregojë se Irani nuk është i vetmi aktor i përfshirë”.

Shqipëria është shtëpia e 3 000 anëtarëve të një grupi opozitar iranian në mërgim, Organizatës Popullore Muxhahedine të Iranit.

Vitin e kaluar, hakerat iranianë sulmuan shërbimet komunale në Shqipëri.

”Standardi ynë është i qartë: ligji, shkenca, transparenca dhe detyrimet evropiane – jo histeria”, tha Rama.

”Ne po e hapim vendin, po mbrojmë pasuritë e tij natyrore, po tërheqim investime serioze dhe po ecim vazhdimisht drejt anëtarësimit në BE”, theksoi ai.

Burimi ATSH