Rikthehen ekspeditat arkeologjike në Bushat dhe Koman!

Instituti i Arkeologjisë dhe Universiteti i Varshavës, Poloni, nisën projektin kërkimor në qytetin antik në Bushat, nën drejtimin e Saimir Shpuzës dhe Piotr Dyczek, shkruan ministrja e Kulturës, Elva Margariti, në faqen e saj zyrtare në Facebook.

Pas ekspeditave të para, gjatë të cilave u zbuluan dy porta hyrëse të qytetit, që krijuan një hartë më të qartë të shtrirjes së tij, gërmimet janë përqendruar në qytetin e mesëm dhe të sipërm, që mendohet të jetë ndërtuar në shek. III p.e.s., për të zbuluar organizimin e brendshëm të urbanistikës, planimetrinë e ndërtimeve të qytetit dhe rolin e tyre.

Ndërkohë projekti kërkimor, arkeologjik që po zhvillohet që nga viti 2010 në vendbanimin e Komanit nën drejtimin e Etleva Nallbanit, Elvana Metallës dhe Helidon Sokolit nga DRTK, Shkodër po hedh dritë mbi këtë vendbanim të mesjetës së hershme me synim ta hapë atë për vizitorët. Këtë vit ky sit është shenjuar dhe pajisur me sinjalistikën orientuese falë bashkëpunimit mes DRTK, Shkodër dhe projektit kërkimor Shqiptaro-Francez,🇦🇱-🇫🇷 CRNS Paris.