Ministri i Brendshëm, Taulant Balla u shpreh sot se shqiptarët presin pastrimin e territorit nga kultivimi i paligjshëm i bimëve narkotike.

Ndërsa ndau pamje nga operacionet antikanabis, Balla theksoi se lufta kundër kultivimit të lëndëve narkotike vijon çdo ditë.

“Kultivimi i paligjshëm i kanabisit ka qenë një burim financash për organizatat kriminale, i cili duhet shuar përfundimisht”, tha Balla.

Policia e Shtetit po vijon megaoperacionin policor antikanabis i koduar “FOKUSI”. Kontrollet gjatë 72 orëve të fundit janë zhvilluar në malësinë e Krujës, në qarkun Shkodër, në qarkun Lezhë dhe në Tropojë, në terrene të vështira malore dhe në fshatra të thella.

Në megaoperacion janë angazhuar 7000 punonjës policie dhe 90 dronë të cilësisë së lartë, për kontrollin e territorit dhe për asgjësimin e bimëve narkotike.

Si rezultat i kontrolleve dhe përdorimit të dronëve, janë asgjësuar në total 24 220 bimë narkotike cannabis sativa./ ATSH