Parku Kombëtar i Butrintit po tërheq gjithnjë e më shumë turistë vendas dhe të huaj, duke u bërë pikë kyçe e turizmit kulturor në vend.

Ministri i Turizmit, Kulturës dhe Sportit, Blendi Gonxhja deklaroi sot, se për Butrintin është planifikuar program i integruar investimesh dhe ndërhyrjesh që synon përmirësimin e infrastrukturës, avancimin e projekteve teknike dhe ruajtjen e trashëgimisë kulturore.

Gonxhja tha se përmes bashkëpunimit të MTKS-së, fondacionit “Butrint Management” dhe “Albanian American Development Foundation” (AADF), kjo iniciativë vendos në qendër përvojën e vizitorit, sigurinë dhe zhvillimin e qëndrueshëm të një prej pasurive më të rëndësishme kulturore në Shqipëri.

Sipas Gonxhes, këto projekte përfshijnë hartimin e projektit të hidranteve kundër zjarrit, të rrjetit elektrik shpërndarës dhe sistemit të ndriçimit.

Ministri Gonxhja tha se ndërhyrja përfshin edhe sistemimin dhe mbulimin me dhé steril dhe konservim të rrënojave të Forumit Romak, ndërhyrje mirëmbajtëse në monumentet e Parkut Kombëtar të Butrintit dhe hartimin e projektit për restaurimin dhe interpretimin e ri të Kalasë Veneciane në Akropolin e Butrintit.

Gjithashtu, Gonxhja tha se ndërhyrja do të jetë edhe në infrastrukturë dhe shërbime për vizitorët, si zëvendësimi i sinjalistikës interpretuese, orientuese dhe kufizuese, rehabilitimi i parkimit, biletarisë dhe tualeteve dhe zbatimi i projektit të platformave të aksesueshmërisë.

Parku Kombëtar Arkeologjik i Butrintit ka një sipërfaqe prej 15 hektarësh dhe ndodhet në lartësi 30-50 metra mbi nivelin e detit. Ai është ngritur në këndin juglindor të gadishullit të Ksamilit. Ka një pozitë mjaft të mbrojtur natyrore, duke u lagur nga të dyja anët nga liqeni i Butrintit, gjysmë i kripur dhe gjysmë i ëmbël, dhe në njërën anë nga kanali i Vivarit.

Burimi ATSH