Zëvendëskryeministrja Belinda Balluku, njëherësh ministre për Infrastrukturën dhe Energjinë bëri të ditur sot se Shqipëria prej muajsh kryeson renditjen e vendeve me rritjen më të mëdha në ulje – ngritje të avionëve civil.

Balluku publikoi raportin e EUROCONTROL, i cili krahason numrin e fluturimeve për javën 9-14 gusht në vitet 2019 dhe 2023.

Të dhënat tregojnë se Shqipëria kryeson listën e vendeve duke shënuar një rritje me 80 % të numrit të ulje-ngritjeve të avionëve.

“Në 2016 kur lufta në Siri impaktoi ndjeshëm trafikun tonë ajror, dukej e vështirë rimëkëmbja e trafukt ajror në korridorin ku Shqipëria përket, por sot zyrtarisht falë përpjekjeve të përbashkëta të qeverisë shqiptare, të djemve dhe vajzave, burrave dhe grave që kontribuojnë në Albcontrol, Agjencinë Kombëtare të Trafikut Ajror dhe padyshim me punën e palodhur që bëhet prej kohësh tani në Autoritetin e Aviacionit Civil – AAC , për të sjell vendin tonë në standartet më të larta ndërkombëtare, kemi keto rezultate të pakontestueshme”, u shpreh Balluku.

Sipas saj, punë e shkëlqyer bëhet çdo ditë nga Aeroporti Ndërkombëtarë i Tiranës, që ka përballuar me profesionalizëm e sukses fluksin e udhëtarëve të këtij viti që i përkon faktikisht parashikimive për vitin 2027.

“Tashmë na presin përpara projekte të reja që do i japin akoma më shumë fuqi e zë aviacionit ciliv në Republikën e Shqipërisë. Nëse punojmë të gjithë së bashku, nëse punojmë mbi strategji e politika të mirëstudiuara, vetëm rezultate të shkëlqyera do të kemi përpara”, shtoi Balluku. /ATSH