Në datën 1 shtator, Ambasadori Takada, së bashku me drejtoren e Përgjithshme të Institutit të Shëndetit Publik (ISHP) znj. Albana Fico dhe kryepërfaqësuesin e Zyrës së JICA për Ballkanin z. Takeichi Jiro, morën pjesë në ceremoninë e firmosjes së marrëveshjes për zbatimin e Projektit për Zhvillimin e Kapaciteteve për Mbrojtjen ndaj Sëmundjeve Infektive, përfshirë COVID-19.
Marrëveshja u nënshkrua mes ISHP-së si institucion implemetues i këtij projekti dhe Agjencisë Japoneze për Bashkëpunim Ndërkombëtar (JICA).
Qëllimi i këtij projekti është rritja e kapaciteteve të ISHP-së për të luftuar sëmundjet infektive, përfshirë COVID-19. Nëpërmjet këtij bashkëpunimi do të sigurohen automjete të cilat do të mundësojnë një shtrirje më të gjerë dhe më efektive të fushatës së vaksnimit, automjete me pajisje frigoriferike për transportin e sigurtë të vaksinave, si dhe trajnime për stafin përkatës.
