Drejtori i Përgjithshëm i Agjencisë së Inteligjencës Financiare, Ervin Koçi, deklaroi se Shqipëria është e angazhuar në përmbushjen e rekomandimeve të MONEYVAL, mekanizmi i Këshillit të Evropës për vlerësimin e masave kundër pastrimit të parave, financimit të terrorizmit dhe përhapjes së armëve të dëmtimit në masë.

Duke raportuar në Komisionin për Nismat Qytetare, Bashkëpunimin dhe Mbikëqyrjen Institucionale, Koçi theksoi se ky proces ka qenë kompleks dhe ka kërkuar angazhimin e koordinuar të një numri të madh institucionesh në drejtim të përmirësimin e kuadrit ligjor, institucional dhe operacional të vendit.

Sipas tij, përmbushja e rekomandimeve të MONEYVAL përbën një element kyç për besueshmërinë kombëtare dhe ndërkombëtare të Shqipërisë, si dhe për forcimin e integritetit të sistemit financiar, duke ndikuar drejtpërdrejt në procesin e integrimit evropian.

Koçi nënvizoi se Shqipëria do të vijojë angazhimin për të ruajtur dhe thelluar standardet e kërkuara nga Bashkimi Evropian dhe taskforca e Veprimit Financiar (FATF), në funksion të parandalimit dhe luftës kundër krimit financiar.

“Shqipëria ndodhet në një fazë intensive të përmbushjes së kritereve të procesit të integrimit europian dhe njëkohësisht, është subjekt i vlerësimeve periodike nga institucionet ndërkombëtare në fusha specifike me rëndësi kombëtare dhe ndërkombëtare”, deklaroi Koçi.

Burimi ATSH