Evropa po orienton vëmendjen drejt Lindjes, me synim përfundimin e procesit të zgjerimit të Bashkimit Evropian dhe forcimin e konkurrueshmërisë së saj në nivel global, shkruan “Anntena Sud”.

Në ish-Manastirin e Teatinëve në Leçe, në prani të autoriteteve kryesore civile dhe ushtarake të territorit, si dhe të zëvendëspresidentit ekzekutiv të Komisionit Evropian, Raffaele Fitto, u diskutuan mundësitë dhe sfidat që lidhen me integrimin e vendeve të Ballkanit në BE, me fokus të veçantë Shqipërinë dhe Malin e Zi.

Takimi u përqendrua në rëndësinë e zgjerimit evropian, i cili nuk kufizohet vetëm në dimensionin ekonomik, por përfshin edhe fusha të tjera strategjike, si siguria, kërkimi shkencor dhe bashkëpunimi universitar.

Integrimi i vendeve të Ballkanit u paraqit si një proces që mund të ndikojë në forcimin e lidhjeve ndërmjet vendeve të rajonit dhe institucioneve evropiane.

Shqipëria dhe Mali i Zi synojnë ta përfundojnë procesin e integrimit evropian deri në vitin 2030.

Të dyja vendet e konsiderojnë anëtarësimin në Bashkimin Evropian një element të rëndësishëm për konsolidimin e rolit të Ballkanit në ekuilibrat ekonomikë dhe gjeopolitikë ndërkombëtarë.

Zgjerimi drejt rajonit shihet gjithashtu në kuadër të përpjekjeve për forcimin e bashkëpunimit dhe stabilitetit në kontinent.

Në diskutime u përfshi edhe Ukraina, duke e zgjeruar perspektivën përtej mbështetjes ndaj vendit në konfliktin me Rusinë.

Sipas këtij vizioni, procesi evropian duhet të lidhet me një projekt më të gjerë bashkëpunimi dhe integrimi, që synon të krijojë mundësi të reja për zhvillimin dhe forcimin e lidhjeve ndërmjet vendeve evropiane.

Në këtë kuadër, Leçe dhe rajoni i Pulias mund të luajnë një rol strategjik si një “Portë e Evropës” drejt Lindjes.

Pozicioni gjeografik i Pulias e vendos atë në një pikë të rëndësishme lidhjeje me Ballkanin, duke krijuar mundësi për zhvillimin e marrëdhënieve ekonomike, institucionale dhe kulturore me vendet që ndjekin rrugën e anëtarësimit në Bashkimin Evropian.

Bashkëpunimi mes Pulias dhe vendeve të Ballkanit mund të shtrihet në disa fusha, përfshirë zhvillimin ekonomik, kërkimin shkencor, arsimin e lartë dhe sigurinë.

Këto fusha konsiderohen pjesë e një qasjeje më të gjerë për forcimin e marrëdhënieve ndërmjet Italisë, vendeve të rajonit dhe institucioneve evropiane.

Diskutimi në Leçe zhvillohet në një periudhë kur zgjerimi i Bashkimit Evropian drejt Ballkanit mbetet një prej çështjeve të rëndësishme të agjendës evropiane.

Shqipëria dhe Mali i Zi vijojnë proceset e tyre të integrimit, ndërsa perspektiva e zgjerimit lidhet me synimin për të forcuar bashkëpunimin dhe stabilitetin në Evropë.

Për Pulian, roli si “Porta e Evropës” drejt Lindjes paraqet mundësinë për të shërbyer si urë lidhëse mes Italisë, Bashkimit Evropian dhe Ballkanit.

Ky pozicion mund të mbështesë projekte të reja bashkëpunimi dhe zhvillimi, duke përfshirë jo vetëm vendet kandidate për anëtarësim, por edhe rajonin evropian.

Marrë nga ATSH