Agjencia për Administrimin e Pasurive të Sekuestruara dhe të Konfiskuara (AAPSK), e përfaqësuar nga kryeadministratorja e saj, Risena Xhaja, ka nënshkruar në Tiranë Memorandumin e Partneritetit dhe Bashkëpunimit me Agjencinë për Menaxhimin e Pasurive të Sekuestruara të Federatës së Bosnjë-Hercegovinës (FAZUOI), e përfaqësuar nga drejtori ekzekutiv, Emir Bašić.

Në njoftimin e AAPSK-së thuhet se ky memorandum, që vjen në vazhdën e marrëveshjes së nënshkruar më herët me Agjencinë për Rikuperimin dhe Menaxhimin e Pasurive (ARMA) të Ukrainës, përbën një tjetër hap të rëndësishëm në rrjetëzimin rajonal dhe ndërkombëtar të institucioneve përgjegjëse për administrimin e pasurive të përfituara nga veprimtaria e paligjshme.

“Ai forcon bashkëpunimin ndërinstitucional në fushën e administrimit dhe përdorimit social të pasurive të sekuestruara e të konfiskuara, duke krijuar bazën për projekte të përbashkëta, shkëmbim përvojash, trajnime dhe nisma të përbashkëta ndërgjegjësuese”, thuhet në njoftimin zyrtar.

AAPSK cilëson se “nëpërmjet këtij dokumenti, palët angazhohen të zhvillojnë veprimtari të përbashkëta kërkimore, arsimore dhe praktike, të nxisin shkëmbimin e informacionit, si dhe të ndërtojnë platforma të përbashkëta bashkëpunimi në fushën e menaxhimit të pasurive, në përputhje me standardet më të mira evropiane”.

Pas nënshkrimit të Memorandumit, Kryeadministratorja e AAPSK, Risena Xhaja, theksoi se “kjo marrëveshje konsolidon rolin e Shqipërisë si një partner i besueshëm në rrjetin evropian dhe rajonal të institucioneve që luftojnë krimin e organizuar, përmes administrimit transparent dhe me përgjegjësi të pasurive të sekuestruara dhe të konfiskuara”.

Nga ana e tij, drejtori i FAZUOI, Emir Bašić, vlerësoi bashkëpunimin me AAPSK si një hap të rëndësishëm për ndërtimin e një fronti të përbashkët institucional kundër pasurimit të paligjshëm, duke theksuar rëndësinë e ndarjes së përvojave dhe praktikave më të mira ndërmjet vendeve të rajonit.

Nënshkrimi i këtij memorandumi vjen në kuadër të përpjekjeve të vazhdueshme të AAPSK për të thelluar bashkëpunimin ndërkombëtar dhe për të avancuar integrimin e Shqipërisë në rrjetet evropiane të menaxhimit të pasurive, në mbështetje të parimeve të sundimit të ligjit dhe transparencës.